Kryeministri i Kosovës Albin Kurti, ka uruar besimtarët katolikë e protestantë për festën e pashkëve.
Ai, përmes një postimi në Facebook, ka thënë se Pashkët janë simbol i sakrifikimit, i shpresës dhe i fillimeve të reja.
Sipas Kurtit, ky fillimvit na “ka dëshmuar sërish se kur bëhemi bashkë tejkalojmë çdo pengesë, sado e madhe të jetë”, përcjell Bota sot.
Kujtojmë se dje ka dështuar seanca për zgjedhjen e presidentit, në mungesë të një vote.
Urimi i plotë i Kurtit:
Urime Pashkët për të gjithë besimtarët katolikë e protestantë!
Kjo fundjavë është e veçantë për besimtarët katolikë e protestantë në Kosovë dhe në mbarë botën. Janë këto ditët e afrimit me njëri-tjetrin por edhe të besimit mes nesh.
Si festë e ringjalljes dhe ripërtëritjes, Pashkët janë simbol i sakrifikimit dhe i shpresës, i fillimeve të reja.
Si shoqëri dhe si shtet po kalojmë kohëra të vështira si pasojë e pandemisë Covid-19 por edhe e problemeve të grumbulluara me dekada, sfida që përveçse aftësisë shpeshherë testojnë edhe durimin tonë. Por, ky fillimvit na ka dëshmuar sërish se kur bëhemi bashkë tejkalojmë çdo pengesë, sado e madhe të jetë.
Andaj, sot lutemi dhe urojmë për më shumë mirësi e më shumë dashuri.
Gëzuar Pashkët!
