Bamirësit nga Kërçova pas lajmit për të moshuarën 70 vjeçe e cila rrezikonte të mbetej në rrugë i siguruan qiranë e banesës për afro 2 vjet deri në gjeten e një zgjidhje afatgjate me ndërtimin e banesave sociale.
Islam Kasa nga fshati Sërbicë ka dërguar pagesën e qirasë, ndërsa Organizatat Humanitare do të vazhdojë ta ndihmojë me produkte ushqimore.
“Kjo është kontrata, që e kemi siguruar për banesën, kjo banesë është siguruar përmes një djali nga fshati Sërbicë që jeton në Amerikë, Islam Kasa ai kur ka dëgjuar rastin është paraqitur përmes organizatës tonë dhe ne e bëmë kontratën me pronarin e banesës dhe është e paguar derisa të sigurohet një banesë sociale”, tha Muhamed Mehmedi.
Lotët të moshuarës pushuan, ajo e emocionuar falënderoi të gjithë ata që e kanë ndihmuar.
“Ju faleminderit shumë, Zoti jua ruajt familjen edhe atij që na ka ndihmuar Zoti ja ruajt familjen, fëmijët, Zoti i shtoftë, ju faleminderit edhe juve”, tha Samaetka Rushiti.
Një muaj më parëmedia solli historinë e 70-vjeçares e cila rrezikonte të mbetej në rrugë pas problemeve që ishin shfaqur me vajzën e saj dhe ishte e pamundur që bashkëjetesa e tyre të vazhdonte.
