Murtezaj: Franca s’është kundër Kosovës në Këshillin e Evropës

Aktuale

Murtezaj: Franca s’është kundër Kosovës në Këshillin e Evropës

Më: 13 maj 2022 Në ora: 18:48
Valon Murtezaj

Ambasadori i Francës në Beograd, Pierre Cochard, gjatë ditës ka deklaruar se aplikimi i Kosovës në Këshillin e Evropës është veprim i njëanshëm.

Në lidhje me këtë deklaratë të tij,profesori i diplomacisë, Valon Murtezaj, tha se kjo nuk duhet kuptuar në mënyrën se Franca është kundër anëtarësimit të Kosovës në Këshillin e Evropës.

“Sa pata mundësi ta shikojë intervistën e ambasadorit francez në Serbi, në një media lokale përkundër insistimit të gazetares që të marrë një përgjigje se si do të votojë Franca, ai u përgjigj se nuk duhet të bëhet një pyetje e tillë sepse procesi i aplikimit tani ka filluar dhe në fakt procesi i anëtarësimit i ka disa faza dhe merr kohë”.

“Deklarimi që ai togfjalëshi “aplikimi i njëanshëm” ishte një gjuhë diplomatike e përgjithshme duke u thirrur në komunikimin dhe dhënien e rëndësisë dialogut. Megjithatë, kjo nuk duhet të kuptohet në asnjë mënyrë se Franca është kundër anëtarësimit të Kosovës në Këshillin e Evropës”, është shprehur Murtezaj.

Tutje, ai tha se është detyrë e Kosovës për t’u koordinuar dhe komunikuar me secilin anëtar të Këshillit të Evropës, nga të cilët pret votë pozitive.

“Vendet që e kanë njohur Kosovën është e pritshme që të do të votonin pro, por asnjëherë nuk ka siguri të plotë. Nuk guxohet që të startohet një proces dhe të lihet ashtu pa u marrë me të gjatë gjithë kohës”, tha Murtezaj.

Ai, gjithashtu tha se diplomacia e Kosovës nuk do të duhej ta marrë si të mirëqenë anëtarësimin në Këshillin e Evropës, teksa shtoi se nuk dihet për afatin kohor se sa mund të zgjas ky proces.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat