Gërvalla mesazh Irlandës për punën e anëtarësimit në Këshillin e Evropës

Aktuale

Gërvalla mesazh Irlandës për punën e anëtarësimit në Këshillin e Evropës

Më: 21 maj 2022 Në ora: 14:30
Donika Gërvalla

Pavarësisht përpjekjeve e thirrjeve nga Berlini, në mbledhjen e 20 majit të Komitetit të Ministrave të Këshillit të Evropës që u mbajt në Torino të Italisë nuk u fut në rend dite aplikimi i Kosovës për anëtarësim. Kësisoj, Kosovës do t’i duhet që të pres deri në majin e vitit 2023, kur do të mblidhet përsëri Komiteti i Ministrave në Rekyavik të Islandës, për të bërë përpjekje që aplikimi të procedohet e të ecet me hapat tjerë të anëtarësimit.

Ndërkohë dje në Torino është shënuar edhe fundi i presidencës italiane me KiE, dhe tashmë Irlanda do të kryesojë presidencën e Këshillit të Evropës.

Kryediplomatja kosovare, Donika Gërvalla, e cila edhe ka dorëzuar ditë më parë aplikacionin për anëtarësim, ka uruar menjëherë Irlandën për marrjen e kryesimit të presidencës me Këshillin e Evropës, derisa ka thënë se mezi pret të vazhdojë bisedimet rreth anëtarësimit të Kosovës në Këshillin e Evropës.

“Ne i dëshirojmë Irlandës një presidencë të suksesshme në Këshillin e Evropës. Ne presim që të vazhdojmë dialogun tonë rreth anëtarësimit të Kosovës në Këshillin e Evropës”, ka shkruar Gërvalla.

Dje në mbledhjen e Komitetit të Ministrave në Torino, Kosova s’ka qenë fare pjesë e agjendës, e s’është përmendur në asnjë prej komunikatave e dokumenteve të lëshuara më pas në faqen zyrtare. Por ka pasur ministra të jashtëm të shteteve mike të Kosovës, që gjatë fjalës së tyre në këtë takim, e kanë përmendur çështjen e anëtarësimit të Kosovës dhe kanë kërkuar që Kosovës t’i hapen dyert e KiE-s.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat