Dy vjet më parë Tribunali ia preu Hashim Thaçit rrugën për në SHBA

Aktuale

Dy vjet më parë Tribunali ia preu Hashim Thaçit rrugën për në SHBA

Më: 24 qershor 2022 Në ora: 17:33
Hashim Thaçi

Dy vjet më parë, papritmas Zyra e Prokurorit të Specializuar në Hagë doli me njoftim se para pak muajsh i kishte ngritur aktakuzë ish-Presidentit Hashim Thaçi.

Ky njoftim e zuri Thaçin në gjysmë të rrugës për në SHBA. Kreu i shtetit nuk hyri si i pandehur në Shtëpinë e Bardhë. Vendosi të kthehej mbrapsht. Rrugën tjetër që e mori ishte për në Hagë, i arrestuar.

Zyra e Prokurorit të Specializuar kishte qëlluar ditën e lindjes së ish-Presidentit Hashim Thaçi, për të ngritur aktakuzën ndaj tij. Por kjo s’u bë publike menjëherë atë ditë, më 24 prill të vitit 2020.

Njoftimin se kreu i shtetit të Republikës po akuzohej për krime lufte sa ishte udhëheqës i UCK-së, ZPS-ja e bëri publik vetëm më 24 qershor. Si sot, para dy vjetësh, Presidenti Thaçi kishte planifikuar vizitë në Uashington. Ai u kthye në gjysmë të rrugës, pasi tanimë ishte publikisht i akuzuar.

Në një komunikatë të dërguar mediave, Zyra e Prokurorit të Specializuar pretendonte se “Hashim Thaçi, Kadri Veseli dhe të dyshuar të tjerë janë penalisht përgjegjës për afërsisht 100 vrasje të paligjshme. Krimet e paraqitura në aktakuzë përshijnë qindra viktima të identifikuara shqiptarë, serbë dhe romë të Kosovës dhe kundërshtarë politikë”.

Atëkohë, SHBA-ja po tentonte të lëvizte diçka në dialogun e bllokuar mes Kosovës dhe Serbisë dhe ish-presidenti amerikan Donald Trump e kishte aktivizuar Richard Grenellin si emisar special.

Kishte spekulime që thonin se Gjykata Speciale e nxori papritmas njoftimin për aktakuzën e ngritur dy muaj më parë, për të ndërhyrë në aktivitetin politik të Presidentit Thaci. Sikur ta dinte për hipotezat që do të ngriheshin, ZPS-ja e arsyetonte publikimin e njoftimit pikërisht në atë kohë.

“Prokurori i Specializuar e gjykon të domosdoshëm nxjerrjen e këtij njoftimi publik për akuzat, për shkak të përpjekjeve të përsëritura të Hashim Thaçit dhe Kadri Veselit për pengimin dhe sabotimin e punës së Dhomave të Specializuara të Kosovës”, thuhej aty.

Thaçi kishte vendosur të mos shkonte në SHBA, si i akuzuar. Për këtë njoftonte Grenell.

“Unë e respektoj vendimin e tij për të mos marrë pjesë në diskutimet, derisa të zgjidhen çështjet ligjore të këtyre pretendimeve”, ka thënë Grenell përmes një postimi në rrjetin social Tëitter më 24 qershor.

Ish-presidenti qëndroi në krye të shtetit edhe disa muaj, derisa iu konfirmua aktakuza nga Dhomat e Specializuara, në nëntor të 2020-s.

Megjithatë muajt e verës dhe fillimvjeshtës së 2020-s nuk i kaloi në detyrë të plotë. Kosova dhe Serbia u takuan në Shtëpinë e Bardhë në shtator, por Thaçi, tanimë me aktakuzë të ngritur, nuk shkoi atje. Delegacionin kosovar e drejtoi Kryeministri i asaj kohe, Avdullah Hoti.

Në ditën e dorëheqjes, Thaci tha se donte që në Hagë të shkonte Presidenti i Kosovës.

“Ashtu siç kam premtuar, nuk do te lejoj që para gjyqit të dal presidenti. Unë sot jap dorëheqje nga pozita e Presidentit të Republikës së Kosovës. Ftoj forcat politike të dëshmojnë maturinë që kërkon koha dhe të mos lejojnë të thellohemi në krizë kushtetuese e institucionale”, tha presidenti në konferencën për media në Prishtinë”, tha Thaci më 5 nëntor, për t’u nisur pas disa orëve për në Hagë.

Prej gati dy vjetësh, një ish-president, dy ish-kryeparlamentarë dhe një ish-deputet qëndrojnë në burg.

Sot dy vjet nuk dihej se kush ishin “të tjerët” në aktakuzën e Thaçit dhe Veselit. Më vonë u zbulua se janë ish-shefi i Inspektoratit të UCK-së, Rexhep Selimi dhe ish-zëdhënësi i UCK-së, Jakup Krasiniqi.

Atyre u është mohuar disa herë të mbroheshin në liri.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat