​Kurti: Kosova angazhohet për dialog me qendër njohjen reciproke

Aktuale

​Kurti: Kosova angazhohet për dialog me qendër njohjen reciproke

Më: 28 qershor 2022 Në ora: 20:24
Foto nga takimi

Kryeministri Albin Kurti është takuar sot me ambasadorët e shteteve të QUINT-it dhe Përfaqësuesin e Posaçëm të BE-së në Kosovë, me të cilët ka biseduar mbi zhvillimet politike në vend dhe situatën politike në rajon.

Në takim u diskutua për proceset dhe çështjet lidhur me dialogun ndërmjet Kosovës dhe Serbisë, si dhe temat tjera të ndërlidhura.

Kurti ritheksoi se Qeveria e Kosovës është e angazhuar për dialog parimor, nga i cili duhet të përfitojnë qytetarët e të dyja vendeve, nëpërmjet një marrëveshjeje ligjërisht të obligueshme, që në qendër ka njohjen reciproke.

U bisedua për marrëveshjen për targat, që ka skaduar me 21 prill të këtij viti, si dhe për propozimin e Qeverisë së Kosovës për trajtimin e çështjes së targave.

Po ashtu, u diskutua edhe për marrëveshjen mbi zbatimin e udhërrëfyesit të energjisë sipas marrëveshjeve të vitit 2013 dhe 2015.

U theksua angazhimi i Qeverisë në zbatimin e udhërrëfyesit, me qëllim të përfundimit të një problematike të trashëguar, tё furnizimit dhe pagesës sё energjisë nё komunat Leposaviq, Zubin Potok, Zveçan dhe Mitrovicë Veriore.

U potencua se me këtë marrëveshje, buxhetit të Republikës së Kosovës do t’i kursehen me dhjetëra milionë euro në vit, të paguara më herët për mbulimin e kostove energjetike të komunave në veri të Kosovës.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat