2 Korriku, Krasniqi: Respekt e mirënjohje për të gjithë delegatët

Aktuale

2 Korriku, Krasniqi: Respekt e mirënjohje për të gjithë delegatët

Më: 2 korrik 2022 Në ora: 11:57
Memli Krasniqi

Kryetari i Partisë Demokratike të Kosovës, Memli Krasniqi, ka përkujtuar 2 korrikun, dita kur u miratua Deklarata Kushtetuese e Kosovës.

Krasniqi, përmes një postimi në facebook, tha se përkundër kushteve të vështira, delegatët e Kosovës, me vendosmëri e shpallën këtë deklaratë, si njësi të pavarur dhe të barabartë me të tjerat vende t ish-Jugosllavisë.

“32 vjet më parë, përkundër kushteve të një shtetrrethimi policor nga ana e regjimit serb që mbante peng ndërtesën e Kuvendit, delegatët e popullit të Kosovës, të palëkundur nga vendosmëria, e shpallën Deklaratën Kushtetuese për Kosovën, si njësi e pavarur dhe e barabartë me Republikat e tjera të ish-Jugosllavisë. Ishte ky një akt themeltar që do t’i paraprinte Kushtetueses së Kaçanikut, dy shtylla këto që janë prelud i vullnetit të popullit tonë për liri dhe pavarësi”, ka shkruar Krasniqi në facebook.

Në përkujtim të kësaj date, Krasniqi tha se nderohen të gjithë ata që kontribuuan në realizimin  e kësaj deklarate.

“Në përkujtim të 2 korrikut të vitit 1990, nderojmë sot të gjithë ata burra dhe gra që në një moment të ndryshimeve kapitale politike, e bënë një hap të guximshëm për t’i hapur rrugë realizimit të vullnetit politik të popullit tonë dhe për ta bërë këtë rrugë të pakthyeshme – rrugë e cila ishte me plot sakrifica e që kulmoi me sakrificën sublime të popullit tonë, me luftën e Ushtrisë Çlirimtare të Kosovës”.

“Respekt e mirënjohje për të gjithë delegatët e Kosovës që në kushte e rrethana të vështira, sot 32 vjet më parë, i dhanë orientim të ardhmes së pashmangshme të Kosovës, si shtet i lirë, demokratik e i pavarur”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat