NISMA delarohet për takimin me Kurtin

Aktuale

NISMA delarohet për takimin me Kurtin

Më: 22 korrik 2025 Në ora: 19:11
Limaj dhe Kurti

Gjatë fundjavës që lamë pas, kreu i Lëvizjes Vetëvendosje, njëherësh edhe kryeministër në detyrë Albin Kurti, u takua me kryetarin e Nismës Socialdemokrate Fatmir Limajn, në përpjekje për të arritur një marrëveshje.

Në një konferencë për media gjatë së hënës, kryeministri në detyrë Albin Kurti tha se partia e tij ka gatishmëri për të bashkëqeverisur me Nismën Socialdemokrate të Fatmir Limajt, parti së cilës tha se i ka bërë ofertë konkrete, por që sipas Kurtit për detajet e saj nuk mund të flasë pasi akoma nuk është konkretizuar në marrëveshje.

Megjithatë, oferta e re duket se nuk i ka pëlqyer dhe aq Nismës Socialdemokrate.

Nga kjo parti, deklaruan se kanë vazhduar me propozimin që Fatmir Limaj të jetë kryeparlamentar, por që ky propozim nuk u pranua nga Lëvizja Vetëvendosje.

“Ne konsiderojmë se Fatmir Limaj, kryetar i Kuvendit, është edhe në interesin e LVV-së, sikurse edhe të gjithë skenës politike në përgjithësi. Kryetari Limaj, ka ndërtuar ura bashkëpunimi gjatë gjithë karrierës së tij politike me subjektet e përfaqësuara në kuvend.

Në takimin e fundit nuk ka pasur dakordim rreth kësaj teme, dhe NISMA e ka marrë një ofertë tjetër nga LVV-ja, aktualisht nuk mund të themi se ka përafrime.”, thuhet në deklaratën e kësaj partie për sinjalin.

Dakordim për propozimet e njëra-tjetrës nuk kishte, por për takime të tjera po.

Kreu i LVV-së, partisë fituese të zgjedhjeve të shkurtit, tha gjatë së hënës se shpreson që bisedimet me partinë e Limajt të finalizohen gjatë kësaj jave.

“Këtë fundjavë do ta kemi lajmin për marrëveshjen e arritur ose mungesën e saj”, deklaroi Kurti.

Ndërkohë gjatë së martës, presidentja e vendit Vjosa Osmani, njoftoi se i është drejtuar Gjykatës Kushtetuese me një kërkesë për interpretim lidhur me pasojat juridike që mund të lindin në rast se Kuvendi i ri nuk konstituohet brenda afatit të përcaktuar prej 30 ditësh.

Osmani shtoi se ky është një rast i paprecedentë në jetën politike të Kosovës dhe se mungesa e konsensusit për konstituimin e Kuvendit brenda afatit kushtetues ka krijuar një situatë të paqartë ligjore. Ajo shpreson që Kushtetuesja ta prioritizojë këtë çështje. 

comment Për komente lëvizni më poshtë
Sot mund të lexoni Shfletoni kopertinat