Tensione të forta mes partive në Kuvend: PDK e AAK përplasen me LVV-në – ja çfarë po ndodh

Tensione dhe përplasje verbale janë shënuar të mërkurën në Kuvendin e Kosovës, gjatë aktiviteteve të organizuara me qytetarë. Deputetë të PDK-së dhe Aleancës kanë kundërshtuar pjesëmarrjen e deputetëve dhe figurave të Lëvizjes Vetëvendosje në aktivitet, duke kërkuar që të vazhdojë seanca konstituive e Kuvendit.

Në momentin kur deputetët e VV-së janë afruar për të komunikuar me qytetarët, deputetët e PDK-së kanë protestuar dhe kanë brohoritur, duke krijuar situata të tensionuara në sallë.

Përplasjet janë shënuar edhe gjatë fjalimeve të zyrtarëve të VV-së. Ministrja në detyrë e Drejtësisë, Donika Gërvalla, nuk ka arritur ta mbajë fjalën e saj për shkak të brohoritjeve nga deputetët e PDK-së.

Sipas raportimit, ndaj Gërvallës janë dëgjuar thirrjet “Demokraci” dhe “UÇK”.

Një situatë e ngjashme është krijuar edhe me ushtruesen e detyrës së presidentes, Albulena Haxhiu. Ajo është përballur me thirrjet e deputetëve të PDK-së për vazhdimin e seancës konstituive dhe nuk e ka zhvilluar konferencën për media në hollin e Kuvendit.

Haxhiu ka bërë të ditur se konferencën nuk do ta mbajë nëse deputetët e PDK-së nuk largohen nga hapësira.

Ndërkohë, gjatë zhvillimeve në sallë, deputetë të opozitës kanë bërë edhe përpjekje për t’i larguar nga salla disa deputetë të Vetëvendosjes, duke e rritur edhe më tej tensionin.

Përplasjet vijnë në kohën kur Kuvendi vazhdon të përballet me ngërç rreth konstituimit dhe vazhdimit të seancës konstituive.

Deputetja nga radhët e grupit parlamentar të Lëvizjes Vetëvendosje, Donika Gërvalla tha se vazhdimi i seancës konstituive do të thirret kur të ketë marrëveshje politike.

Gërvalla u pengua të fliste para mediave teksa deputetët e tjerë të opozitës ndërhynin duke thënë “thirreni seancën”.

“Seanca do të thirret në momentin që kemi një marrëveshje…”, tha Gërvalla.

Gërvalla gjatë ballafaqimit me deputeten e PDK-së, Blerta Deliu Kodra e pyeti atë se pse nuk vijnë në takim për marrëveshje politike, kurse Deliu Kodra ia kujtoi asaj se është detyrim kushtetues thirrja e seancës konstituive.

“Pse nuk vjen në takim?”, tha Gërvalla.

“E ke detyrim me thirrë seancën, thirre seancën, thirre seancën”, tha Deliu Kodra.

Deputetët e PDK-së dhe AAK-së po qëndrojnë në hollin e Kuvendit të Kosovës, duke kërkuar vazhdimin e seancës konstituive, ndërsa në sallën plenare po zhvillohet aktiviteti tradicional “Bashkatdhetarët në Kuvend”.

Ndërkohë, në rrjetet sociale janë publikuar pamje të një diskutimi mes ushtrueses së detyrës së presidentes, Albulena Haxhiu, dhe deputetes së PDK-së, Vlora Çitaku, teksa ato incizoheshin nga pjesëtarë të mërgatës.

PDK-ja kishte paralajmëruar se do të paraqitej në Kuvend pavarësisht nëse kryesuesi i seancës, Avni Dehari, do ta thërriste atë zyrtarisht. Më vonë, edhe AAK-ja iu bashkua kërkesës për vazhdimin e seancës.

Shefi i grupit parlamentar të PDK-së, Arian Tahiri, tha se partia e tij po kërkon funksionalizimin e Kuvendit dhe mbrojtjen e rendit kushtetues.

“Nëse shteren mundësitë brenda Kuvendit, do të jenë hapat tonë të tjerë të guximshëm për ta mbrojtur shtetin”, tha Tahiri.

Edhe deputeti i AAK-së, Besnik Tahiri, tha se partia e tij nuk do të lejojë, siç u shpreh, “dhunimin e së drejtës së qytetarëve”.

Pas fjalimeve, deputetët e PDK-së dhe AAK-së dolën nga salla dhe vazhduan të qëndrojnë në hollin e Kuvendit.

Pak para largimit të tyre, në sallë hynë edhe dy deputetë të Lëvizjes Vetëvendosje. Deputeti Vigan Qorrolli tha se ata po merrnin pjesë në aktivitetin me mërgatën, ndërsa aksionin e opozitës e cilësoi si "të lejueshëm".

Megjithatë, Qorrolli përsëriti qëndrimin e LVV-së se duhet të arrihet fillimisht një marrëveshje politike për vazhdimin e konstituimit të Kuvendit dhe formimin e Qeverisë.

PDK-ja tha se të gjitha partitë ishin ftuar të merrnin pjesë në sallë, por deputetët e LDK-së nuk u panë aty.

Ndërkaq, Dehari ka thënë se seanca nuk duhet të vazhdojë pa një marrëveshje politike mes partive.

Afati 30-ditor ka përfunduar

Përplasja rreth vazhdimit të seancës vjen pasi ka përfunduar afati 30-ditor për konstituimin e Kuvendit.

Rezultatet përfundimtare të zgjedhjeve të 7 qershorit u certifikuan më 8 korrik, ndërsa afati 30-ditor për konstituimin e Kuvendit përfundoi më 7 gusht.

Seanca konstituive nisi më 6 gusht, por Kuvendi nuk arriti të përfundonte zgjedhjen e kryetarit dhe nënkryetarëve. Procesi mbeti pezull për shkak të mungesës së një marrëveshjeje politike.

Pikërisht për zbatimin e këtij aktgjykimi, 14 organizata të shoqërisë civile, të udhëhequra nga AVONET, i janë drejtuar Gjykatës Kushtetuese.

Në thelb të ngërçit politik mbetet çështja e zgjedhjes së presidentit të ardhshëm.

Lëvizja Vetëvendosje ka kërkuar një marrëveshje më të gjerë politike dhe një kandidat konsensual e jopartiak për president, ndërsa LDK-ja ka kërkuar që posti t’i takojë asaj.

PDK-ja ka insistuar që fillimisht të respektohen procedurat kushtetuese dhe të përfundojë konstituimi i Kuvendit. AAK-ja, ndërkaq, ka kërkuar respektimin e afateve kushtetuese dhe ka fajësuar Vetëvendosjen për bllokimin institucional.

Bashkimi Evropian u ka bërë thirrje partive politike në Kosovë që të arrijnë sa më shpejt marrëveshje për një kandidat të përbashkët për president, duke paralajmëruar se vonesat në formimin e institucioneve mund të pengojnë reformat dhe të ndikojnë në përfitimin e fondeve të BE-së.

Ushtruesja e detyrës së Presidentit të Kosovës, Albulena Haxhiu, ka ndërprerë një konferencë për media në hollin e Kuvendit, pasi pranë saj u shfaqën deputetë të PDK-së dhe AAK-së, të cilët kërkuan vazhdimin e seancës konstituive.

Haxhiu tha se prania e deputetëve po ia pamundësonte mbajtjen e konferencës dhe iu drejtua deputetes së PDK-së, Ganimete Musliu.

“Ah, paska planifiku PDK-ja me mbajtë konferencë. Hajdeni. Vazhdoni”, tha Haxhiu.

Më pas, ajo shtoi: “Në momentin kur PDK-ja na e bën të mundur, na lejon të mbajmë konferencë, dal”, përpara se të largohej nga foltorja.

Teksa po largohej, deputetë të PDK-së i kërkuan Haxhiut të thërriste seancën, duke i thënë: “Thirre seancën” dhe “Mos ik”.

Deputeti i Aleancës  Besnik Tahiri, është deklaruar nga foltorja e Kuvendit pas ftesës së Partisë Demokratike të Kosovës (PDK) për vazhdimin e seancës konstituive.

Tahiri tha se deputetët ndodhen në Kuvend pas ftesës së PDK-së, me qëllim të ushtrimit të një funksioni që, sipas tij, është jetik për Kosovën.

“Ne ndodhemi këtu me ftesë të PDK-së për të ushtruar një funksion që është jetik për Kosovën”, tha Tahiri..

Ai theksoi se sovraniteti i takon qytetarëve dhe institucioneve të zgjedhura, duke e cilësuar bllokimin e punës së Kuvendit si cenim të rendit kushtetues dhe demokracisë.

“Sovraniteti i takon popullit, i takon institucioneve të zgjedhura. Bllokimi i Kuvendit të Kosovës është cenim i sovranitetit, rendit kushtetues dhe demokracisë”, deklaroi ai.

Tahiri tha se deputetët nuk do të lejojnë, në asnjë mënyrë, që sipas tij, të cenohet e drejta e qytetarëve.

“Ne nuk do të lejojmë në asnjë formë, në asnjë mënyrë, që të dhunohet e drejta e qytetarëve”, u shpreh deputeti i Aleancës.

Deputetët e Partisë Demokratike të Kosovës (PDK) dhe Aleancës po qëndrojnë në sallën plenare të Kuvendit të Kosovës, duke kërkuar nga kryesuesi i seancës konstituive, Avni Dehari, që të thërrasë vazhdimin e saj. Ndërkaq nga Lidhja Demokratike e Kosovës nuk ka deputetë të pranishëm.

PDK-ja, përmes një letre drejtuar Deharit, ka kërkuar që seanca të thirret pa vonesa dhe deputetëve të zgjedhur t’u mundësohet ushtrimi i mandatit.

Sipas PDK-së, moskonstituimi i Kuvendit brenda afatit të përcaktuar ka krijuar një situatë të rëndë kushtetuese, por tejkalimi i këtij afati, sipas saj, nuk e shuan detyrimin për përfundimin e procesit të konstituimit.

“Obligimi për përfundimin e procesit konstituiv mbetet dhe duhet të përmbushet pa vonesa të mëtejshme”, thuhet në njoftimin e PDK-së.

Edhe Aleanca ka njoftuar se do t’u bashkohet deputetëve të PDK-së në sallën plenare.

Deputeti i Aleancës, Besnik Tahiri, ka thënë se partia e tij do të marrë pjesë në qëndrimin e paralajmëruar nga PDK-ja, ndërsa ka përsëritur thirrjen drejtuar Deharit për vazhdimin e seancës.

“Siç e dini PDK-ja ka thirrur seancë në orën 11:00 dhe Aleanca do të marrë pjesë. Tash është informata që mediat nuk po lejohen të marrin pjesë në seancë. Nuk e dimë se qysh e pse. Mirëpo mungesa e transparencës dhe qasja që e kemi nga LVV-ja është duke e çuar shtetin e Kosovës në humnerë”, ka deklaruar Tahiri.

Ndërkohë, deputetja dhe nënkryetarja e PDK-së, Vlora Çitaku, ka mbajtur një fjalim brenda sallës së Kuvendit, ku ishin të pranishëm edhe disa pjesëtarë të diasporës.

Çitaku ka kërkuar që të thirret vazhdimi i seancës konstituive, duke thënë se deputetët e zgjedhur duhet të kenë mundësi ta ushtrojnë mandatin e tyre.

“Ne këtu jemi deputetë të zgjedhur, por dyert për ne janë të mbyllura”, ka thënë Çitaku.

Ajo më pas ka theksuar rëndësinë e institucioneve të Kosovës, duke kujtuar edhe sakrificën për krijimin e tyre.

“Kuvendi nuk është thjesht objekt, nuk është ndërtesë me tulla, është institucion. Kam qenë në këtë ulëse e ulur ditën kur u shpall Pavarësia e Kosovës. Është derdh gjak, mund, djersë, sakrificë që Kosova me pas institucione. Nuk guxojmë me u sill sikur s’po ndodh asgjë”, është shprehur Çitaku.

Në sallë ishte edhe ushtruesja e detyrës së presidentes, Albulena Haxhiu. Gjatë fjalimit të Çitakut pati edhe një shkëmbim të shkurtër mes tyre, pasi Çitaku tha se dyert e Kuvendit ishin të mbyllura për deputetët.

Ndërkohë, Kuvendi i Kosovës ende nuk është konstituuar, pasi në dy tentimet e deritanishme nuk është arritur të zgjidhet kryetari i Kuvendit dhe të përmbyllet procesi i konstituimit të Legjislaturës së 11-të.

Seanca konstituive vazhdon të jetë në qendër të përplasjeve mes partive parlamentare, ndërsa mosformimi i institucioneve të reja po e zgjat krizën politike në vend.

Sot është dita e tretë që Kuvendi i Kosovës është i hapur për vizitorë nga diaspora. Në këtë kuadër, deputetët e PDK-së dhe Aleancës kanë hyrë në sallën plenare dhe kanë kërkuar që procesi i konstituimit të vazhdojë.