Ish-bashkëpunëtori i Rugovës: Partitë politike të pastrohen nga gjaku i keq

Politika

Ish-bashkëpunëtori i Rugovës: Partitë politike të pastrohen nga gjaku i keq

Hava Orana Xhukolli Nga Hava Orana Xhukolli Më 4 dhjetor 2020 Në ora: 18:13
Presidenti brahim Rugova, Binak Aliçkaj, ish kryetar i komunës së Deçanit dhe Skënder Zogaj

Rreth një javë më parë, kur Lidhja Demokratike e Kosovës humbi komunën e Podujevës, pati kritika të mëdha sa i përket kësaj partie. U tha nga shumëkush se duhet të ketë ndryshime brenda partisë, pasi komuna e Podujevës është vetëm një mesazh për LDK-në.

Të dielën që lëmë pas, Lëvizja Vetëvendosje me kandidatin e saj Shpejtim Bulliqin kanë fituar zgjedhjet në komunën e Podujevës që dikur ishte bastion i LDK-së.

Por a duhet të ketë reforma brenda LDK-së, të gjendet fajtori për këtë humbje dhe anëtarët e vjetër të zëvendësohen me të rinjët?

“LDK është pjesë e pandashme e popullit tonë, doli nga populli, për t’i shërbyer popullit”

Image
Faton Bislimi

Lidhur me këtë ҫështje, gazeta “Bota sot” ka kontaktuar me deputetë e zyrtarë tjerë të LDK-së. Mirëpo ata kanë hezituar të përgjigjen në këtë temë. Ndëkaq deputeti i LDK-së, Faton Bislimi ka folur për reformat që duhet të bëhen brenda kësaj partie.

Në një shkrim autorial dërguar gazetës, deputeti Bislimi thotë se LDK-ja është një parti e pandashme e popullit, pasi doli nga populli. Sipas tij, LDK-ja mori përsipër barrën e procesit të shtetbërjes, ndërsa sot ende ka barrën e shtuar, jo vetëm politike.

“Si prijetare e proceseve më të rendësishme politike të Kosovës në historinë moderne të saj, LDK është pjesë e pandashme e popullit tonë, sepse ajo doli nga populli, për t’i shërbyer popullit. LDK mori mbi supe barrën e madhe të procesit të shtetbërjes, të cilën suksesshëm e ka bartë sepse nën supet e saja kishte popullin e Kosovës. Edhe sot, në pluralizmin politik të Kosovës së lirë e demokratike, LDK vazhdon të ketë barrën e shtuar dhe jo vetëm politike”, thotë Bislimi.

Sipas tij, edhepse LDK-ja s një shtëpi akademike e politikbërjes e suksesshme me dekada, ka nevojë për ribrendim politik. Por siҫ thotë Bislimi, LDK-ja duhet të mësoj nga e kaluara, nga sukseset dhe dështimet e saj.

“Si parti politike, LDK vazhdon të jetë një shtëpi akademike e politikbërjes. Por, sikur cdo organizatë tjetër, edhepse e suksesshme me dekada, edhe LDK ka nevojë për ribrendim politik. Sot më shumë se kurrë, LDK duhet të mësojë nga e kaluara – si nga sukseset ashtu edhe nga dështimet. Fati i mirë i saj është se ka shumë më shumë histori suksesi sesa dështimi. Prandaj, e ka më të lehtë mësimin. E ka më të lehtë ribrendimin. Neglizhimi i nevojës për ribrendim politik të LDK-së i sjellë humbje të mëdha dhe besa edhe të priparueshme jo vetëm LDK-së, por gjithë Kosovës. E, në traditën e LDK-së është të qenurit gardian i vendit, dhe jo anasjelltas”, vlerëson deputeti Bislimi.

Zogaj: Partitë kanë nevojë të pastrohen nga gjaku i keq

Image
Skender Zogaj

Ndërkaq analisti politik, dikur bashkëpunëtor i themeluesit të kësaj partie, Presidentit historik, Ibrahim Rugovës, Skender Zogaj ka thënë se në kohën e themelimit, LDK-ja ka qenë një ‘bombë me sahat’ brenda gjithë kampit ish-komunist dhe ka mposhtur diktaturën e kuqe.

“Lidhja Demokratike e Kosovës është subjekti politik i sajuar nga vullneti gjithëpopullor, në kohën dhe rrethanat më të egra të barbarizmit serb në Kosovë! Edhe pse në rrethana absurdi, me rrezikun e zhdukjes së shqiptarëve, vigjilenca gjithëpopullore ka funksionuar për mrekulli dhe ka krijuar LDK-në me një sukses të pabesueshën vetëdijeje, dhe ka kurorëzuar një parti të plotëkuptimtë demokratike, cila është bërë "bombë me sahat" brenda gjithë kampit ish- komunist dhe e ka mposhur diktaturën e kuqe”, thotë Zogaj.

Ai thotë më tutje se ky fakt ështe shkaku i shqetësimit të të gjitha forcave antidemokratike, të cilat nuk mund ta honepsin LDK-në dhe, me të gjitha mënyrat e mjetet, po përpiqen që ta shkatërojnë, rrënuesen e diktaturës sllavo-komuniste ndër shqiptar.

“Ky është faji kryesor që kundërshtatët ideologjik shohin te LDK-ja dhe, me fushata propagandistike meskine duan ta dëmtojnë. Këtë synim e e kanë pranuar "shpëtimtarët" që në fakt janë argatët "shkatërrimtarë" brenda dhe jashtë LDK-së, që, jemi dëshmitarë të veprimeve të shumta dhe gjahut të egër të shtrigave”, vlerëson Zogaj.

Sa i përket reformimit, Zogaj thotë se LDK-ja dhe të gjitha partitë kanë nevojë për ‘pastrim nga gjaku i keq’. Ai thotë se LDK-ja nga pësimet do të marrë mësime dhe do të përjashtoj logjikën e individëve shpëtimtarë, pasi individi nuk mund të jetë shpëtimtarë.

“Është e vërtetë se LDK-ja dhe të gjitha partitë në Kosovë kanë nevojë për reformim të thellë dhe pastrim nga gjaku i keq, i krijuar apo i porositur diverziv brenda të gjitha partive, e sidomos brenda LDK-së që është themeltarja e demokracisë shqiptare! Pjellat e barkut të "Kalit të Trojës" dihet se pikësynim e kanë me ia fut flakën LDK-së, gjë që nuk u ka munguar suksesi! Por, LDK-ja nga pësimet besoj ka me marrë mësime dhe, ka me vepru me vigjilencë historike duke përjashtuar logjikën e individëve "shpëtimtarë" sepse individi nuk mund të jetë shpëtimtar kurrë, përkundrazi nxjerr kultin e individit, që prodhon hitler, enver, stalin, gadaf...”, thotë Zogaj për “Bota sot”.

“Anëtarësia e gjerë e LDK-së është forca e Kosovës”

Sa i përket asaj se a duhet të largohen të vjetrit dhe të zëvendësohen me të rinj, Zogaj thotë se mosha është vlerë, që paraqet përvojën, përkushtimin e idealin ndaj partisë. Sipas tij, këtë e kërkojnë ata që kanë për mision shkatërrimin e kësaj partie.

“Logjika që të largohen të vjetrit është destruksion. Mosha për më tepër është vlerë, që paraqet përvojën, përkushtimin, idealin dhe devotshmërinë ndaj konceptit partiak! Dhe, pse u dashka të largohen të vjetrit? Kjo është marrëzi që e kërkojnë të marrët, të cilët thirren si "shpëtimtarë" por mision e kanë shkatërrimin! LDK-ja duhet ta ketë këtë parasysh dhe të mobilizoj të gjitha shtesat e anëtarësisë nga baza, duke u pastruar nga bari i keq strukturat nga aktivet tek Qendra”, vlerëson Zogaj.

Ai madje përmend edhe ata se kush mund të jenë të dëmshëm dhe të papranushëm për udhëheqës partiak. Sipas tij, anëtarësia e LDK-së ka heshtur por është forca e Kosovës.

“Asnjë emër i përvetshëm që del nga koluaret jashtëpartiake nuk mund të jenë autoritete të pranueshme. Përkundrazi, të tillët kushdo qofshin, janë të papranueshëm për udhëheqës partiak! Te LDK-ja kjo praktikë ka treguar se është shumë e dëmshme, prandaj duhet të flaket pa hezitim, me çdo lloj çmimi! Më mirë është me humb për të fituar, se me fitu për të humbur! Anëtarësia e gjerë e LDK-së ka heshtur, por ajo është forca e Kosovës”, thekson analisti politik, Skender Zogaj.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat