Dialogu me Serbinë pritet të fillojë brenda këtij muaji.
Mirëpo, po pretendohet se BE është e pafuqishme që të ndërmjetësojë ndërmjet Kosovës dhe Serbisë.
Kështu po vlerëson ish-kandidati i pavarur për President, Seremb Gjergji, që sipas tij, ndërmjetësimin e vërtetë e bënë vetëm Amerika.
Gjergji për gazetën “Bota sot”, thotë se Kosova në parullat e saj gjithmonë është me Amerikën.
“Tash edhe në veprime dhe vepra vetëm me Amerikën. Koha e fundit që e ndajmë shapin prej sheqerit. Kryeministër Kurti, "dy atllar në një mullar" nuk lidhen kurrë. Andaj, sugjeroi që ju duhet të orientoheni vetëm me Amerikën - me raporte të shëndosha me Anglinë dhe Gjermaninë. Nuk ka rrugë tjetër të mirë për vendin tonë. Kosova do të ketë pasoja marramendëse nëse luajnë me dy palë letra”, vlerëson Gjergji.
Sipas tij, lufta e Kosovës e ka trasuar rrugën e vet: vetëm me Amerikën.
“BE i ka dy defekte tepër të mëdha në këtë proçes të bisedimeve: Nuk ka fuqi të vendosë për asgjë - përjashto shtetet individualisht. Të dy negociatorët vijnë nga shtetet e BE-së që nuk e kanë njohur Kosovën. Defekt marramendës për BE-në e tragjedi për ne. Këto dy defekte, jo vetëm se e bëjnë të pa mundur suksesin, por po e çojnë vendin dhe politikën tonë strategjike drejtë izolimit. Një izolim i tillë veç po shihet - nuk ka takime bilaterale mes institucioneve tona dhe shteteve tjera. Madje edhe Presidenca është izoluar”, shton tutje ai.
Gjergji pohon se, këtu nuk po hyjnë edhe defektet, pa përgatitjen strategjike (çka të bëjë në Kosovë) dhe korrupsionin që ka treguar BE ndaj Kosovës.
“Ata nuk e dinë se ku kanë shkuar €100 e më shumë miliarda që BE-ja i ka dedikuar për Kosovën si ndihma që nga paslufta në Kosovë! Nuk kanë filluar investimet qindra miliardëshe në Kosovë, që ka premtuar BE. Nuk ka LIBERALIZIM për Kosovën se ata nuk janë në gjendje të pajtohen. Nuk ka ndihmesë financiare nga BE për avancimin infrastrukturës së përgjithshme të Kosovës - sipas premtimeve të tyre!? Nuk ka ndihma as në vakcina COVID19 sipas deklaratave të udhëheqësve të vet vendeve të BE-së. Mos llogarit vendet individualisht! Nuk ka mundur të implementoi IBM-in me Serbinë nga 2013-ta. Është dashur Marrëveshje e Uashingtonit për një ditë ta bëjë realitet?!”, thotë ai.
Sipas tij, Kosova gabon shumë rëndë nëse mbështetet në BE.
“Lista është shumë e gjatë e defekteve të tyre, por këto mjaftojnë ta di popull i këtij vendi dhe kuptojmë që BE nuk ka kurrfarë fuqie vendimmarrëse për një marrëveshje të njohjes reciproke Kosovë-Serbi. Z. Kurti, para çdo fillimi të bisedimeve, unë do të kërkoja që sëpari realizimin e premtimeve të bëra nga vet BE, si shenjë gatishmërinë për të filluar t'iu besojmë në proces. Ta dijnë të gjithë; "Me pasë qenë BE aq e mirë, Britania e Madhe kish qëndruar brenda saj", ka thënë kryeministri britanik Boris Johnson”, potencon ai.
Gjergji shton se, Qeveria Amerikane dhe qasja e saj në bisedimet me Serbinë është tepër e favorshme për Kosovën.
“Vetëm një ditë nga Marrëveshja e Uashingtonit, ka sjellë më shumë përfitime për Kosovën, se 8 vjet bisedime me ndërmjetësimin e BE-së. Qasja amerikane në këto bisedime aktualisht duket se është kjo: Nuk ka ndarje të Kosovës. Nuk ka Asociacion me kompetenca shtet-formuëse. Ka investie kapitale miliardë dollarësh në Kosovë dhe mijëra vende të reja pune. Ka integrim dhe avancim të shtetit të Kosovës brenda dhe jasht vendit. Kosova mbetet në axhendën e prioriteteve të Qeverisë amerikane. Anëtarësimi i Kosovës në NATO, etj.”, pohon ai.
Gjergji potencon se udhëzimet dhe deklarimet e Ndihmës Sekretarit të Shtetit Amerikan z. Palmer në Kosovë janë të qarta për të gjithë.
“Kësaj radhë unë jam vetëm me Amerikën - a është Qeveria juaj z. Kryeministër?”, përfundon Seremb Gjergji.
