Ish-diplomati britanik në Bosnje e Hercegovinë Timothy Less, ka reaguar për deklaratën e kryetares së Komitetit të Helsinkit për të Drejtat e Njeriut në Serbi, Sonja Biserko, lidhur me idenë e shkëmbimit të territoreve. Në një intervistë për gazetën “Bota sot”, humanistja serbe ka akuzuar ish-diplomatin e Britanisë se ai dhe Richard Grenell, janë në listën e pagave të Beogradit, për lobim për ndarjen e Kosovës.
“Ideja e ndarjes së Kosovës nuk është zhdukur. Ka ende lojtarë që punojnë për të. Milorad Dodik deklaroi së fundmi: “Nëse Trump do të kishte fituar, ne do të kishim folur ndryshe sot”. Disa lojtarë shpresojnë për një ndryshim të administratës në vitin 2024. Richard Grenell dhe Timothy Less po vizitojnë rregullisht Ballkanin. Timothy Less vazhdon të mbrojë rikompozimin e Ballkanit. Disa burime në Beograd thonë se ata të dy janë në listën e pagave të Beogradit”, ka deklaruar Sonja Biserko.
Por, udhëheqësi i projektit “Studimet e Shpërbërjes” të Qendrës për Gjeopolitikë dhe Strategji në Universitetin e Cambridge, ka mohuar akuzat, duke i quajtur të pavërteta. Në një prononcim për “Bota sot”, Less ka thënë se Biserko nuk po e kupton perspektivën time për Ballkanin
“Komentet e zonjës Biserko janë thjesht të pavërteta dhe sugjerojnë se ajo nuk e kupton perspektivën time për Ballkanin apo motivimet e mia si studiues dhe analist i pavarur: të them të vërtetën për zgjidhjen me të meta multietnike të imponuar në Ballkan në vitet 1990”, është shprehur Timothy Less.
Ai ka theksuar se ankesat kombëtare të pazgjidhura në Ballkan po rrezikojnë kthimin e dhunës dhe po ofrojnë terren pjellor për Rusinë dhe Kinën.
“Argumenti që kam bërë vazhdimisht në shkrimin tim është se kjo po përjetëson një gjendje konflikti të ngrirë në Ballkan që e pengon Perëndimin të përmbushë objektivat e veta: zhvillimin politik dhe ekonomik të rajonit dhe integrimin e tij në NATO dhe BE. Në vend të kësaj, ankesat kombëtare të pazgjidhura ofrojnë terren pjellor për Rusinë dhe Kinën që të zgjerojnë ndikimin e tyre dhe të rrezikojnë kthimin në dhunë, nëse dhe kur Perëndimi përfundimisht humbet ndikimin në rajon”, ka shtuar Timothy Less për “Bota sot”.
