Bllokada është Serbia/ Kosova duhet të mbajë këtë qëndrim rreth formimit të Asociacionit

Politika

Bllokada është Serbia/ Kosova duhet të mbajë këtë qëndrim rreth formimit të Asociacionit

Nga: A.SH Më: 6 dhjetor 2021 Në ora: 23:04
Foto nga takimi Kurti-Vuçiq (foto arkiv)

Nuk dihet se kur do të ketë takim ndërmjet palës së Kosovës dhe asaj të Serbisë për vazhdimin e dialogut.

Kryeminsitri Albin Kurti më herët kishte deklaruar se është i gatshëm, kurdo që BE thërret për takimin.

Por, nga ana tjetër zëdhënësi i Bashkimit Evropian, Peter Stano, ka thënë se Prishtina dhe Beogradi nuk kanë gatishmëri për dialog.

“E kemi bërë shumë të qartë, pas dy takimeve këtë vit, që parakusht për takimin e radhës duhet të jetë gatishmëria e të dyja palëve që të dakordohen rreth rezultateve konkrete për të mirën e qytetarëve të tyre. Kontaktet e fundit të Përfaqësuesit të Lartë të BE-së për Politikë të Jashtme dhe Siguri (Josep Borrell) dhe diplomacia e Përfaqësuesit të BE-së për dialog, Mirosllav Lajçak treguan që aktualisht nuk ka gatishmëri”, thuhet në deklaratën e tij.

Lidhur me këtë, për gazetën “Bota sot”, ka folur analisti Islam Krasniqi, i cili ka thënë se, në këtë proces nuk është e gatshme Serbia.

Ai ka thënë se qëllimi i Serbisë është që Republika e Kosovës të dalë para një akti të kryer lidhur me themelimin apo krijimin e asociacionit, marrëveshje e nënshkruar nga përfaqësuesit tanë në Bruksel.

“Kosova është e gatshme për dialog, mirëpo politika e Serbisë nuk është e gatshme, sepse ajo përmes kësaj bllokade po mundohet që Republika e Kosovës të dalë para një akti të kryer lidhur me themelimin apo krijimin e asociacionit, marrëveshje e nënshkruar nga përfaqësuesit tanë në Bruksel”, ka thënë ai.

Sipas tij, edhe kryeminsitri Kurti më parë kishte deklaruar se është i gatshëm për dialog, por Serbia është ajo e cila po e bllokon këtë proces.

“Z.Kurti ka thënë se është i gatshëm për të vazhduar dialogun, ku edhe zv. Kryeministri shkoi për dialog në Bruksel e që pala serbe refuzoi takimin, që na bënë të kuptojmë se ku egziston problemi apo ku bëhet bllokada e dialogut. Po ashtu edhe një pjesë e gabimit egziston edhe te pala kosovare sepse s'ka qenë e kujdesshme në procesin e dialogut dhe ka nënshkruar çka do që ju është servuar përpara. Ne nuk duhet të bllokojmë procesin e dialogut, por duhet të jemi shumë të kujdesshëm dhe të formojmë asociacionin duke u bazuar në Kushtetutën e Republikës së Kosovës, e jo të na imponohet nga bashkësia ndërkombëtare siç na imponuan demarkacionin me liberalizimin e vizave dhe në fund e aprovuam asociacionin po asgjë nuk fituam”, përfundon analisti.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat