Krimi dhe korrupsioni janë dy nga problemet më të mëdha që ballafaqohet Kosova.
Që nga pas lufta, këto dy dukuri vazhdojnë të jenë ende prezente, ku luftimi i tyre po sjell edhe pasoja dhe probleme.
Së fundi, Shtetet e Bashkuara të Amerikës kanë filluar të merren seriozisht me luftimin e këtyre çështjeve, jo vetëm në Kosovë, por edhe në shtetet e rajonit.
Departamenti i Shteti amerikan i vendosi nën sanksione udhëheqësit dhe grupet kriminale në Veri të Kosovës, duke i futur në listë të zezë.
Njohësi çështjeve politike, Gani Qarri në një prononcim për gazetën “Bota sot” komentoi luftimin e krimit dhe korrupsionit në vend.
Fillimisht, ai vlerësoi se Qeveria e Kosovës deri më tani ka marrë disa indici të vogla, jo ndonjë aksion shumë të madh.
“Sado që Qeveria Kurti erdhi në pushtet me premtimet për rivendosjen e rendit dhe të ligjit si dhe luftimin e pa kompromis të korrupsionit dhe krimit të organizuar, fatkeqësisht po afron gati një vit që nga marrja e qeverisjes së vendit nga LVV, por aktivitet të njëmendtë antikrim dhe angazhime konkrete për luftimin e vendosur të krimit dhe korrupsionit, përveç disa indiceve të vogla, ende nuk kemi, pothuajse askund në vend”, deklaroi analisti.
Qarri tha se mbështetja e Shteteve të Bashkuara të Amerikës në Samitin e Demokracisë për luftimin e korrupsionit është një ndihmë e madhe për Kosovën.
“Ndaj lajmi i vetëm i mirë dhe shpresëdhënës, për qytetarët e Kosovës, mbetet serish SHBA me Samitin e Demokracisë, që në shpalosjen e planit për luftimin e krimit dhe korrupsionin brenda dhe jashtë vendit, u theksua se ky shtet i madh mik i vendit tonë, do ta ndihmojë edhe Kosovën e vogël me korrupsion e krim të organizuar në përmasa eksplozive në të gjithë sektorët, të cilët duket se me gjithë ndryshimet në Qeverisjen e vendit, pa ndihmën nga jashtë dhe veçanërisht pa mbështetjen e gjithanshme të SHBA-ve, Kosova e ka të pamundshme ti luftojë vetë këto dukuri negative, në mënyrë efikase”, theksoi ai.
Në vazhdim, analisti potencoi se dëmeve që i ka shkaktuar PAN-i, vetëm Amerika mund t’i kundërvihet.
Po ashtu, ai e vlerësoi lartë mbështetjen e presidentit Biden për luftimin e korrupsionit në vendin tonë.
“Madje duke pasur parasysh dëmet e konsiderueshme që për mbi 20 vite, partitë e inkriminuara dhe PAN i shkaktuan Kosovës, Kosova vetëm me ndihmën e SHBA-ve mund ti kundërvihet në mënyrë të suksesshme krimit dhe korrupsionit galopant, të thelluara e përhapura në mënyrë industriale nga partitë e inkriminuara, për më se dy dekada, kudo në vend.
SHBA-të në këtë Samit si udhëheqëse e vendeve demokratike në botë, përveç se premtuan angazhim më të shtuar kundër qeverive autoritare dhe organizatave e grupeve kriminale, administrata e Presidentit Biden i ofroi ndihmë të drejtpërdrejtë shtetit tonë të brishtë, në luftimin e krimit e të korrupsionit”, nënvizoi Qarri.
Krahas kësaj, ai deklaroi se sanksionet ndaj grupeve kriminale në veri të Kosovës janë ndihmesa më e madhe dhënë Kosovës në vendosjen e rendit dhe ligjit.
“Madje pas rreth 22 vitesh, dha edhe shembullin konkret, me vendosjen nën sanksione të udhëheqësve dhe grupeve kriminale në Veri të Kosovës, nga Departamenti i Shteti që është ndihmesa më e madhe konkrete dhënë Kosovës për rivendosjen e rendit dhe të ligjit edhe në këtë pjesë të vendit tonë, tash e mbi 20 vite të sunduar në mënyrë të egër, nga bandat e Serbisë dhe Aleksandër Vuçiqit”, shpjegoi analisti.
Më tej, Qarri tha se pas zbulimit të grupit kriminal në veri të vendit, Qeveria e Kosovës duhet të fillojë hetimet në zbardhjen e bashkëpunëtorëve të tyre, në të kundërtën do të pasojë llogaridhënia.
“Kështu që duke pasur parasysh dëmin që i është bërë Kosovës dhe demokracisë në vend, nga udhëheqësit e kriminalizuar, si dhe politikanët dhe biznesmenët e korruptuar shqiptar, në kooketim të vazhdueshëm me grupet kriminale të udhëhequra nga Zvonko Veselinoviq dhe Milan Radoiçiq, e që këtë të fundit, me urdhër nga lart, e liroi nga aktakuza edhe vet e ashtuquajtura Prokurori Speciale në Prishtinë, premtimi i SHBA-ve dhënë Kosovës për ndihmë, duhet të reflektojë në vepër dhe të sigurohet që brenda një kohe të shkurtër edhe Qeveria e Kosovës të dëshmojë efektet e saj, përndryshe nëse mungon angazhimi konkret i Qeverisë, dhe çdo gjë mbetet vetëm në fjalë, atëherë duhet të pasojë llogaridhënia dhe mbajtja përgjegjës, e vet Qeverisë dhe organeve përkatëse shtetërore për mos angazhim dhe mos vënien në jetë, të premtimeve të dhëna-kot”, tha ndër të tjera ai.
Krejt në fund, analisti përmendi lidhjet e Radoiqiqi dhe Veselinoviqit me Thaçin e Haradinajn.
Bazuar në këtë, ai tha se nëse nuk vepron Qeveria Kurti, atëherë nuk do të zvogëlohen asnjëherë pasojat e krimit dhe korrupsionit në Kosovë.
“Përndryshe, duke njohur pasojat e bashkëpunimit të udhëheqësve më të lartë shtetëror nga ish presidenti Hashim Thaçi e deri te ish kryeministri i qeverisë së PAN-it, Ramush Haradinaj me kriminelët Zvonko Veselinoviq dhe Milan Radoiqiq, madje ky i fundit pritej me nderime edhe në zyrat e qeverisë në Prishtinë, pasoja që tash e mbi 13 vite janë ndjerë me të madhe në çdo cep të Kosovës, po nuk u hedhë në aksion të vendosur Qeveria Kurti, Kosova, jo vetëm që nuk do të mund t’i spastrojë, por nuk do të arrijë as t’i minimizojë, kurrë pasojat e krimit dhe korrupsionit galopant që tash e dy dekada është thelluar e përhapur kudo në vend, përkundër ofrimit të sinqertë të mbështetjes dhe ndihmës konkrete të dhënë prej SHBA-ve”, përfundoi Gani Qarri për “Bota sot”.
