Analisti komenton ‘modelin’ amerikan propozuar për qeverinë e Kosovës

Politika

Analisti komenton ‘modelin’ amerikan propozuar për qeverinë e Kosovës

Nga: A.Z Më: 28 janar 2022 Në ora: 22:34
Jeff Hovenier

Amerikanët i kanë propozuar qeverisë së Albin Kurtit modele që sipas tyre mund të funksionojnë për Asociacionin e Komunave me shumicë serbe. Ambasadori Jeff Hovenier tha se e kanë inkurajuar qeverinë që t’i shqyrtojë. Këtë e ripërsëriti Emisari Special, Gabriel Escobar. Qeveria e Kosovës ka zgjedhur të hesht pasi s’është përgjigjur në pyetjet e gazetës se çfarë modele u janë propozuar nga ShBA-ja dhe se a do t’i shqyrtojnë ato.

Lidhur me këtë, analisti Leon Duhanaj, në një prononcim për “Bota sot”, ka deklaruar se pasojë ku shqiptarët ranë preh e ndikimit të pansllaviste dhe islamiste, ishte atëherë kur diskriminimi pozitiv për serbë e Kosovës ishte derivat i negociatave të Vjenës.

Ai shtoi këtë situate e shfrytëzoi shteti serb, me ç’rast edhe u artikuluan kërkesat për të drejtat e serbëve.

Image
Leon Duhanaj

“Çështja e të drejtave speciale përkatësisht "diskriminimi" pozitiv për serbet e Kosovës, është derivat i negociatave të Vjenes, përkatësisht Pakos Ahtisari, e që për fat të keq, të gjitha këto, janë pasojë e trazirave të marsit të vitit 2004, ku shqiptarët ranë preh e ndikimit të agjenturave pansllaviste e islamiste, ku me zhvillimet në trazira, tmerruam dhe dëshpëruam botën e civilizuar e cila kishte bërë edhe luftë për të na çliruar me bindjen që jemi popull paqësor. Serbia e shfrytëzoj ketë situatë nga e cila u artikuluan kërkesat për të drejta dhe siguri për serbët, në të cilat përpos të drejtave civile u parapa edhe siguria për kishat dhe manastiret ortodokse gjë që do ta kemi barrë nëpër këmbë”, theksoi ai.

Më tej ka potencuar se Kosova do të duhet të kundërshtonte themelimin e Asociacionit, por ai thekson se e mira është që në marrëveshjen e 2015 është përfshirë nevoja e konsultimit të Kushtetutës gjë që është nënshkruar edhe nga Vuçiqi.

“Tani, jemi para një situate kur SHBA dhe BE kanë për qëllim intensifikimin e procesit të dialogut të Brukselit, duke synuar t'i japin epilog përfundimtarë. Kosova e ka marrë si obligim ndërkombëtarë themelimin e Asociacionit dhe ketë do të duhet jo ta kundërshtonte por ta përgatiste si pjesë të paketës së marrëveshjes së përgjithshme. Është mirë që në marrëveshjen e 2015-es është përfshirë nevoja për t'u konsultuar Kushtetuta e Kosovës gjë që garanton të mos ketë kompetenca që bien në kundërshtim me Kushtetutën e Kosovës dhe se ketë e ka nënshkruan edhe Presidenti serb Vuçiq, përkatësisht Serbia. Pra, Qeveria e Kosovës, nuk duhet të deklarohet kundër Asociacionit, por të koordinojë modalitetet që të bëhet statuti në harmoni me këshillat e Gjykatës Kushtetuese dhe kjo të harmonizohet me miqtë ndërkombëtarë në mënyrë që presioni të shkoj kah Serbia dhe Asociacioni të jetë pjesë e pakos së marrëveshjes përfundimtare në mes Kosovës dhe Serbisë", përfundoi ai.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat