Përçarje në PDK!?/ Pas arrestimit të Thaçit, Baton Haxhiu ‘braktiset’ nga Krasniqi e Çitaku, strehimin e gjen te Edi Rama!

Politika

Përçarje në PDK!?/ Pas arrestimit të Thaçit, Baton Haxhiu ‘braktiset’ nga Krasniqi e Çitaku, strehimin e gjen te Edi Rama!

Nga: A.M Më: 22 maj 2022 Në ora: 11:01
Foto ilustrim - "Bota sot"

Gazetari Baton Haxhiu përmes një kolumne të gjatë në të cilën i kritikoi Presidenten Osmani dhe Kryeministrin Kurti, nuk i kurseu as zyrtarë të PDK-së.

Krejt në fund, është marrë edhe me Kreun e PDK’së, Memli Krasniqin dhe nënkryetaren e kësaj partie, Vlora Çitakun, të cilët së fundi u panë në sfilatën e organizuar nga Valdrin Sahiti.

Sipas tij, ata opozitën kanë vendosur ta bëjnë në klubet e natës.

“Natyrisht, aty nuk munguan as Memli Krasniqi e Vlora Çitaku, të cilët kanë vendosur që opozitën ndaj qeverisë ta bëjnë në klubet e natës: Zone, Bon Vivant e Bruni, pa harruar ama asnjëherë se Liria ka Emër. Pa u thelluar në veshjen e zezë të Vlora Çitakut e cila me siguri vjen nga mërzia e thellë, ajo bashkë me Memlin janë shndërruar në sinonime të nënshtrimit ndaj Albin Kurtit”, ka shkruar Haxhiu.

Duke njohur lidhjen e ngushtë të Haxhiut me PDK-në në të kaluarën, këto kritika ngriten dyshime për një përplasje të mundshme.

E në lidhje me këtë temë ka folur, analisti politik, Gani Qarri në një prononcim për “Bota sot”

Sipas tij, kritikat e Haxhiut ndaj nënkryetares së PDK-së ishin befasuese, pasi ishte pikërisht ai që ngulte këmbë që pas arrestimit të Thaçit dhe Veselit, partinë ta udhëheqte Vlora Çitaku.

“Përderisa tandemi Buzhala-Haxhiu, që me kohë, kishin të preferuarit e vet për në krye të PDK-së, kryespiuni i Serbisë në Kosovë, Baton Haxhiu befasoi me kritikat ndaj Memli Krasniqit e Vlora Çitaku, kur tha se këta kanë vendosur që opozitën ndaj qeverisë ta bëjnë në klubet e natës, vetëm pse ata u panë në një manifestim madhështor të modës në Prishtinë, ku merrnin pjesë edhe personalitete tjera politike. Batoni është mësuar t’i shohë krerët e PDK-së në takime me Vuçiqin ku aranzhohen pazare tokash dhe bëhen plane për faljen e veriut të vendit tonë Serbisë hegjemoniste, ndarjen e ri copëtimin e Kosovës dhe shuarjen e shtetësisë së saj, ndaj dhe i duket shumë e panatyrshme, që udhëheqësit e PDK-së të jenë të pranishëm në manifestime mode.

Madje, kur Buzhala deklaronte se Sami Lushtaku ishte personi më i mirë në PDK, i cili në kundërshtim me të tjerët, mban fjalën dhe nuk gënjen, gazetari Baton Haxhiu qonte porosi nga emisionet televizive se PDK-në, pas arrestimit të Kadri Veselit e Hashim Thaçit, duhet ta udhëhiqte Vlora Çitaku, por që tani, duket se ka hetuar zhvillime të pakënaqësisë brenda saj, ndaj edhe spiuni i Stanishiqit ka ndryshuar qëndrimin”, deklaroi analisti.

Image
Analisti politik, Gani Qarri

Krahas kësaj, Qarri e cilësoi Haxhiun si kryespiun të Serbisë, i cili u zhgënyje me PDK dhe udhëheqësit e saj, pasi nuk arritën të futen në qeverinë Kurti.

“Kryespiuni më i bujshëm i Serbisë, duket të jetë zhgënjyer aq shumë, jo vetëm me Memli Krasniqin por edhe me vet zonjën Çitaku, sa që përveçse nuk është më, më e pëlqyeshmja prej tij, për të parën e partisë, ai deklaron se njëjtë si Memli ashtu edhe Vlora janë bërë sinonime të nënshtrimit ndaj Albin Kurtit dhe vetëm pse i pa ata të ishin të pranishëm në sfilatën e organizuar nga Valdrin Sahiti, për Memli Krasniqin dhe nënkryetaren e kësaj partie, Vlora Çitakun, tha se kanë vendosur që opozitën ndaj qeverisë ta bëjnë në klubet e natës.

Krejt kjo, pasi që PDK me kryesinë e re, nuk arriti të futej në Qeveri, siç pretendonte Baton Haxhiu, duke u shprehur se për PDK-në, është jo vetëm parësore, por edhe jetike, pa marrë parasysh mënyrat se si, të futet medoemos në secilën qeveri”, theksoi ai.

Në vazhdim, analisti tha se ëndrrat e PDK-së për tu bërë pjesë e qeverisë u shuan pas vuajtjeve, varfërimit dhe izolimit që ia shkaktoi qytetarëve të Kosovës.

I zemëruar nga kjo gjë, ai tha se Batoni ka mbetur azil në Shqipëri, në mëshirën e Ramës.

“Por varfërimi i popullsisë, izolimi total i vendit dhe gjendja e rëndë ekonomike, në të cilën e sollën vendin partitë e inkriminuara me në krye PDK-në, bënë që njerëzit, me këto parti, të mos ëndërronin më për ditë më të mira, ndaj PDK dhe aleatët e saj, jo vetëm që nuk mundën të jenë pjesë e asnjë qeverie, por edhe të bien aq poshtë me votat e qytetarëve, sa që për kohë bukur të gjatë, të mos kenë më mundësinë, për të udhëhequr me vendin.

Kjo u bë shkak që të shuhen edhe ëndërrat e partisë, ndaj në shenjë vuajtje e nostalgjie, që PDK ka pasur gjithmonë për qeverisje, në pamundësi që të jetë në krye të shtetit dhe udhëheqë me institucionet normale të vendit, tani sapo ka formuar të ashtuquajturën "qeveri në hije" prej nga e ka vështirë të dalë më, për kohë të shpejtë, e kjo ka nisur ta zhgënjejë shumë edhe Baton Haxhiun, i ngelur në mëshirën e azilit, që Edvin Kristaq Rama i ka ofruar përkohësisht në Shqipëri”, nënvizoi Qarri.

Madje, ai kujtoi kohën kur Haxhiu gjatë kohës së qeverisjes së PDK-së gëzonte privilegje të shumta, ku edhe ishte këshilltar i Thaçit bashkë me spiunin e BIA-së, serbe Bratisllav Nikoliqin.

“Përndryshe gjatë gjithë kohës sa kjo parti ka udhëhequr me shtetin, nuk ka dëshmuar kurrë rezultate efektive, përveç "sukseseve" në zhvatje, vjedhje e përvetësime kundërligjore, duke shkatërruar gjithë sistemin e drejtësisë dhe dëshmuar defektet më të mëdha që mund të tregojë një parti e njëmendtë politike në qeverisjen e vendit.

Por Baton Haxhiu, gjatë sundimit të saj, gëzonte të gjitha privilegjet e mundshme dhe ishte këshilltar i Hashim Thaçit bashkë me spiunin e BIA-së së Serbisë Bratisllav Nikoliqin, ndaj dhe porosiste me kohë, që në rast se do të burgoseshin Hashim THaçi e Kadri Veseli, kryetare e re të jet Vlora Çitaku , të cilën e shihte si faktorë që pa marrë parasysh rezultatin e votimeve, PDK-në, vetëm ajo mund ta fuste në Qeveri, akt që Batoni e vlerësonte si akt me shumë rëndësi”, e potencoi analisti.

Tutje, Qarri tha se pas burgosjes së Thaçit, Haxhiu ndërroi pardon dhe shkoi për t’i shërbyer Ramës, pasi dështimet e PDK-së ia adresoi vetes dhe iku për Shqipëri.

“Por duke qenë se, kjo nuk u realizua, dhe spiuni i njohur i Serbisë, gjatë karrierës së tij, u detyrua ti ndërronte disa padron dhe pas Jovica Stanishiqit e Hashim Thaçit, ka rreth dy vite që është futur, tërësisht në shërbim të sivëllait të Vuçiqit, Edvin Kristaq Ramës, dështimet e PDK-së, ai ka filluar ti shohë edhe si dështime të veta, ngase kolegët e tij spiun, si Bratisllav Nikoliqi gjetën vend në Listën srpska, kurse ky, pas arrestimit të Thaçit u detyrua të ikte në Shqipëri, ku ka filluar të mos ndihet i sigurtë as atje.

Ndaj duket se Baton Haxhiu vërtetë po përjeton ditë të këqija dhe nuk po ndihet aspak mirë,në vendin në të cilin ka marrë azil, ngase pas burgosjes së Thaçit, emri i tij ka filluar të harrohet në Kosovë dhe pesha e Baton Haxhiut, po bie në mënyrë rapide, madje edhe Edvin Kristaq Rama, ka nisur ta kuptojë ngadalë se sa i parëndësishëm është bërë Batoni pas ndryshimeve politike në Kosovë, i cili tanimë, nuk mund ti hy më në punë as Serbisë që ta ndihmojë sadopak Aleksandër Vuçiqin, për gllabërimin e Veriut, pra edhe vet Rama ka filluar të tërhiqet dhe të mos i japë më asnjë rëndësi, spiunit të njohur të Serbisë, duke e lënë Batonin tërësisht jashtë dore dhe të vetmuar në fatin e keq të tij”, vlerësoi ai.

Ndërsa, analisti tregoi edhe arsyet e zemërimit të Baton Haxhiut, emri i të cilit ka filluara të ‘shuhet’ pas arrestimit të ish-presidentit Thaçi.

Madje, ai tha se emri i Haxhiut mund të përmendet sërish vetëm nëse ngritet padi ndaj tij.

“Kështu që shuarja e iluzioneve se ai, sërish edhe nga atdheu, do të mund të veprojë si spiun i armiqve të shqiptarëve dhe mungesa e mbështetjes së kuislingut Thaçi, që Batoni të bëjë emër e rritet zëri i tij, duke punuar nga Kosova, për Serbinë hegjemoniste, e kanë sjellë para një zhgënjimi kaq të madh bashkëpunëtorin shqipfolës të UDB-së dhe BIA-së së Serbisë, sa që, përveç sulmeve të pakursyera kundër Presidentes Vjosa Osmani dhe Kryeministrit Kurti, tani ai damkos pa asnjë mëshirë edhe zyrtarët më të lart të PDK-së, si Memli Krasniqi e Vlora çitaku, të cilët për shkak të paaftësive për ti fituar zgjedhjet dhe krijuar vet Qeverinë, jo vetëm që i kanë humbur keq ato, por tani kanë filluar edhe të improvizojnë, duke u argëtuar me të ashtuquajturën "qeveri në hije"!

“Krijesë” e cila jo vetëm se nuk do t’i hy aspak në shërbim PDK-së, por nuk do të mund ta ndihmojë më as spiunin më të njohur shqipfolës të Serbisë, Baton Haxhiun, emri i të cilit, me burgosjen e Thaçit, ka filluar të heshtet dhe kalojë në harresë, i cili mund të përmendet përsëri vetëm nëse së shpejti, nga shteti i Kosovës ngritet padi penale kundër tij, për bashkëpunim me shërbime të huaja sekrete dhe spiunazh kundër vendit, për ti krijuar favore Serbisë”, shpjegoi Qarri.

Ndër të tjera, ai tha se sulmet e Haxhiut ndaj PDK-së, tregojnë qartazi se brenda kësja partie ka përplasje në mes dy grupeve të ndryshme.

“Për aq më tepër sulmet e spiunit të Serbisë kundër emrave kryesor aktual të kryesisë së PDK-së duket sikur sinjalizojnë se brenda kësaj partie, ka jo vetëm përplasje të vogla verbale në prapavijë, por faktikisht ekziston dhe zhvillohet edhe një konflikt i hapur, brenda për brenda partisë ndërmjet grupit të mbështetësve të Hashim Thaçit të cilët nuk mund të pajtohen që PDK-në ta udhëheqë dikush që nuk është nga Drenica, si dhe të një grupimi tjetër fraksionist, që përpiqet për reformimin e njëmendt të kësaj partie”, shpejgoi analisti.

Krej në fund, Qarri deklaroi se Haxhiu donte të zgjidhej kryetar i PDK-së ndonjë kandidatë nga Drenica, pasi në këtë mënyrë ai do t’ia siguronte vetës pozitat dhe privilegjet që kishe në kohën e Thaçit.

“Ndaj i bindur se duke mbështetur ndonjë kandidat të preferuar me origjinë nga Drenica, për tu emëruar kryetar i PDK-së, do ta ndihmonte edhe rikthimin e pozicioneve dhe privilegjeve që ai i kishte dikur në kohën e kuislingut Thaçi, Baton Haxhiu si një dhelpër e vjetër që është, ka mundur ta hetojë me kohë këtë fakt, dhe me shpresën se grupi tjetër do ta nxjerrë edhe atë nga gjendja depresive në të cilën është katandisur si azilant i pavlerë dhe i padëshiruar politiko-ekonomik në Tiranë, ka filluar ta sulmojë publikisht Memli Krasniqin e sapo zgjedhur në krye të partisë dhe Vlora Çitakun si nënkryetare dhe zëvendëse e tij, me shpresën se do i ndihmojë vetes dhe grupit tjetër në krijimin e avantazhit për përmbysjen e kryesisë aktuale të PDK-së, dhe kthimin e kësaj partie në duart e drenicasve, që sipas bindjes së tij,do të ishte edhe shpëtimi i kryespiunit të Serbisë Baton Haxhiu”, përmbylli Gani Qarri për “Bota sot”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat