“Trupi i djegur i Shaban Manajt dhe masakrimi i Ali Ukajt dhe...”/ Albulena Haxhiut i vjen kundërpërgjigja e fortë

Politika

“Trupi i djegur i Shaban Manajt dhe masakrimi i Ali Ukajt dhe...”/ Albulena Haxhiut i vjen kundërpërgjigja e fortë

Nga: P.R. Më: 30 shtator 2022 Në ora: 07:56
Ilustrim/Bota sot

Sipas Ministres së Drejtësisë së Republikës së Kosovës, Albulena Haxhiut, rasti i vdekjes së Astrit Deharit në burgun e Prizrenit, e që nga Vetëvendosje konsiderohet vrasje, është rasti më i rëndë në Kosovën e pasluftës.

“Nuk ka rast më të rëndë në Kosovën e pasluftës se sa rasti Dehari, ku një aktivist politik burgoset pa asnjë përgjegjësi dhe nuk del i gjallë nga burgu dhe ish-ministrja e partisë tënde as nuk e ka marrë mundin të paktën dorëheqje të jepte edhe përkundër kërkesave të shumta qytetare”, ka deklaruar Albulena Haxhiu.  

Por, kjo deklaratë e Ministres Haxhiu, ka nxitur reagimin e Saim Tahirajt, ish bashkëluftëtar i heroit të kombit, Sali Çekaj, i cili i cilëson skandaloze fjalët e Haxhiut.

Image
Saim Tahiraj

“Deklarata të tilla të papërgjegjshme nga politikan të papërgjegjshëm, jemi mësuar t’i dëgjojmë shumë shpesh, madje ndoshta mundë të themi ditore. Aq shumë e kanë kontaminuar opinionin shqiptarë sa që janë bërë normale dhe nuk po reagojnë më ndaj tyre. Të thuash se rasti Dehari është rasti më i rëndë në Kosovën e pas luftës është më tepër se skandaloze”, thotë Tahiraj, i cili i kujton Albulena Haxhiut vrasjet makabre të anëtarëve të LDK-së pas lufte, ku Shaban Manajt madje i ishte djegur edhe trupi pas vrasjes.

“Kur them kështu nuk mendoj se rasti Dehari nuk është i rëndë dhe se më dhembë shpirti për një djalë të ri shqiptar, por mendoj se nuk është rasti më i rëndi në Kosovën e pas luftës, siç po e thotë kjo far Ministre e Drejtësisë. A thua ku ka jetuar kjo zonjë në Kosovën e luftës dhe pasluftës? Në Kosovë apo jashtë Kosovës? Si nuk po i kujtohen shumë vrasje politike të personaliteteve të shquara të LDK-së? A ka vrasje më skandaloze se vrasjete gazetarit Ali Uka,i masakruar në banesën e tij në Tiranë? I Ministrit të Mbrojtjes së RK në mesë të Tiranës? A ka ma krim që hetimet mbyllën shumë shpejt dhe sot e 23 vite pas lufte nuk kërkon askush drejtësi për ta, madje as Ministresha arrogante dhe tabori i saj!”, shprehet Tahiraj për “Bota sot”.

“A ka raste më të rënda se vrasjet; e Ekrem Malokut, Xhemail Mustafës, Ismet Rracit, Ukë Bytyçit, komandant Drinit, vrasja dhe masakrimi i Rexhë Osaj,Sinan Musaj, Ramë Peja, Bashkim Balaj dhe hedhja e tyre në Bunar të një serbi, vrasja kriminale e Tahir Zemajt me të birin dhe Hasan Zemaj, e katër vëllezërve Musaj nga Strellci, e komandantit të Rugovës Smaj Hajdaraj, vrasja dhe djegia e trupit të Shaban Manajt?”, shton SaimTahiraj.

Sipas Tahirajt, brenda VV-së janë të strehuar njerëz që janë të implikuar në vrasjet politike.

“I përmenda vetëm këta sa për të ja kujtuar kësaj Ministres së Drejtësisë sepse lista e të vrarëve politik të LDK-së është shumë e gjatë që për çudi nuk po i kujtohen dhe as që ju kujtuan ndonjëherë Ministres dhe taborit të saj. Nuk ju kujtuan asnjëherë për të vetmin shkak se në mesin e taborit të saj janë strehuar shumë të dyshuar që mund të kenë lidhje me ato vrasje kriminale! Një të tillë e keni nëHagë ku po gjykohet si i dyshuar pikërisht për ato vrasje! Ju çdo herë situatën në Kosove e keni shiquar dhe vlerësuar vetëm nga këndi juaj dhe taborit që i takon, i cili ishte, është dhe do të jetë i një vije ideologjike që e trashëguat nga nëna e juaj LPK. Kjo është pika kryesore që ju mban unik sado që përlahi publikisht për të mbuluar gjurmët”, nënvizon Tahiraj.

Për fund, Tahiraj i bën thirrje Ministres së Drejtësisë që të kërkojë dhe punojë edhe për zbulimin e vrasjeve politike që kanë nodhur në Kosovë.

“Të gjitha lëvizjet e fundit drejtë Hagës e vërtetuan fuqishëm edhe një herë se jeni të njëjtit që nga Tirana me kryeministrin Rama, me ish presidentët e Shqipërisë dhe rrjetin e tyre. Në Kosovë ju që jeni pjellë e asaj ideologji në Shqipëri, madje po bashkëpunoni shkëlqyeshëm me prijësin e Neootomanizmit dhe argatin e Neobolshevizmi Rus. Nëse vërtet kjo Ministreshë e Drejtësisë është Ministre e Drejtësisë e Republikës së Kosovës e jo e VV-së, duhet ta kërkoj dhe zbatoj drejtësinë njëjtë për të gjithë qytetarët e Kosovës. Atëherë le ta merr mundin dhe t’i vizitojë këto familje, ta viziton edhe ish kolegun e sajë deputet, deputetin Fetah Rudi dhe aty do e mësoj të vërteten se cilat raste janë të rënda dhe më të rëndat”, përfundon për “Bota sot” Saim Tahiraj, ish bashkëluftëtar i heroit të kombit, Sali Çekaj.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat