Bodo Weber, bashkëpunëtor i lartë në Këshillin e Politikave të Demokratizimit (DPC), Berlin, ka thënë se është vështirë të parashikohet se a do të nënshkruhet marrëveshja Kosovë-Serbi, sot në takimin që po mbahet në Ohër.
Për gazetën “Bota sot”, Weber ka treguar se pse të dyja palët do të preferonin që të mos ketë sot marrëveshje për udhërrëfyesin lidhur me zbatimin e marrëveshjes së ofruar nga Perëndimi për normalizimin e marrëdhënieve.
“Është shumë e vështirë të parashikohet, pasi negociatat mbeten një proces i mbajtur ngushtë dhe si Prishtina, ashtu edhe Beogradi përfshihen në një xhiro publike. Nga njëra anë, ka presion masiv nga të gjithë aktorët ndërkombëtarë të përfshirë mbi Kurtin dhe Vuçiqin për të nënshkruar marrëveshjen, për të rënë dakord për aneksin e zbatimit në Ohër. Nga ana tjetër, të dyja palët do të preferonin të mos kishin një marrëveshje, por të mos fajësoheshin për dështim - secila për arsyen e tij shumë specifike: Kurti, sepse ai më mirë do të merrte një marrëveshje përfundimtare, gjithëpërfshirëse, e cila do të ishte shumë më e arsyeshme për BE-në dhe SHBA-në; Vuçiq, sepse ai tradicionalisht po luan me dobësinë perëndimore që të mos i duhet të zgjidhë çështjen e Kosovës, d.m.th. të pranojë praktikisht atë që ai dhe e gjithë elita politike serbe e di shumë mirë për shumë kohë - se Kosova ka ikur dhe nuk do të kthehet”, ka thënë Weber.
Sipas tij, “kjo e lë rezultatin e takimit të Ohrit të paparashikueshëm - ai mund të përfundojë në nënshkrimin e marrëveshjes, por gjithashtu mund të mos jetë raundi i fundit i negociatave”.
I dërguari evropian, Miroslav Lajçak, tha se plani synon një zgjidhje të favorshme për të dyja palët. E Weber vlerëson se Kosova në afat të shkurtër mund të ketë shumë përfitime, por në planin afatgjatë, pa njohjen nga Serbia, dialogu do të shembet përfundimisht.
Më pastaj, sipas tij, presidenti serb Aleksandar Vuçiq do të jetë përfituesi i vërtetë.
“Në afat të shkurtër, Kosova ndoshta do të kishte më shumë përfitime, duke filluar me disa njohje nga mosnjohësit, statusin e kandidatit në BE dhe anëtarësimin në disa organizata ndërkombëtare (KE, UNESCO, Interpol). Por në planin afatgjatë, pasi që unë nuk shoh se Perëndimi ka ndonjë plan se si të kalojë nga propozimi i BE-së në një marrëveshje përfundimtare dhe njohjen e Kosovës nga Serbia, kam frikë se dialogu do të humbasë përsëri drejtimin e tij strategjik dhe përfundimisht do të shembet - dhe pastaj Serbia, Vuçiq do të jetë përfituesi i vërtetë, sepse ai do të ketë ripërtërirë aleancën e tij me Perëndimin - pa asnjë presion për çështjen e demokracisë dhe sundimit të ligjit në Serbi, dhe ndoshta edhe pa u rreshtuar me Perëndimin në Rusi. Ndërsa Kosova do të ngecë sërish. Siç do të jenë serbët e Kosovës - të cilët do të jenë sërish dëmi kryesor kolateral i dështimit të dialogut”, ka theksuar Bodo Weber për “Bota sot”.
