Emisari special i BE-së për dialogun Kosovë – Serbi, Peter Sorensen, ka paralajmëruar takim trepalësh në Bruksel.
Këtë paralajmërim, Sorensen e dha pas takimeve që zhvilloi me kryenegociatorët Besnik Bislimi dhe Petar Petkoviq.
Kujtojmë se, takimi ishte paraparë të ishte trepalësh, por që shteti serb mungoi në këtë takim.
E në lidhje me takimet e fundit në kuadër të dialogut Kosovë-Serbi, në një prononcim për “Bota sot” foli avokati serb, Cedomir Stojkoviq.
Si fillim, ai kritikoi këtë qasje të qeverisë serbe dhe se kjo është vetëm një metodë për të blerë kohë.
Avokati serb tregoi shkaqet se pse Serbia po blen kohë.
“Nga sa di unë nga mediat, delegacioni serb nuk mori pjesë në takimin trepalësh në Bruksel, por me justifikimin, i cili është një ngjarje shumë e pazakontë dhe nuk e di nëse i ka ndodhur ndonjëherë dikujt që nga shpikja e aeroplanëve.
Nëse është vërtet e vërtetë që takimi trepalësh ishte planifikuar dhe se nuk u mbajt sepse delegacioni serb u vonua, kjo do të thotë vetëm se Serbia po blen kohë. Domethënë, se Aleksandar Vuçiç po blen kohë. Dikush blen kohë vetëm në dy raste, ose kur pozicioni negociues është i keq për të, ose kur pret të vendosë për një ndryshim strategjie”, deklaroi ai.
Gjithashtu, Stojkoviq zbuloi edhe planet e Vuçiqit dhe se ai po pret zhvillimin e ngjarjeve ndërkombëtare, për të vendosur si të pozicionohet pro Rusisë apo pro Evropës.
“Duke ditur mënyrën se si mendon Aleksandar Vuçiç, besoj se janë të dyja. Nga njëra anë, për shkak të marrëdhënieve me Rusinë, por edhe për shkak të protestave të mëdha në Beograd, pozicioni i Vuçiç është i keq kudo në Evropë përveç në Hungari. Nga ana tjetër, besoj thellësisht se ai po pret zhvillimin e ngjarjeve ndërkombëtare, kryesisht ato që lidhen me mënyrën se si administrata e Donald Trump do të pozicionohet më në fund ndaj Evropës dhe Rusisë. Ai po pret këtë për të vendosur mbi zbatimin e strategjisë së tij. Në fakt, Aleksandar Vuçiç shpreson që Trump do të krijojë marrëdhënie të ngushta me Putinin dhe se ai do ta detyrojë Evropën të heqë dorë nga Ukraina. Vuçiç shpreson që kjo do të rriste pozicionin e tij negociues dhe do të rriste rëndësinë e tij ndërkombëtare, gjë që do të ndikonte në negociatat me Kosovën. Dhe ndoshta i hapi rrugën për një lloj përshkallëzimi”, nënvizoi avokati serb.
Ndër të tjera, ai shtoi se Vuçiq nuk mund të kalojë me skenarët e tij ndaj Sorensen, pasi ky i fundit është eksperti i politikës serbe dhe manipulimeve të saj.
“Unë besoj se blerja e kohës është arsyeja kryesore pse delegacioni serb anashkaloi atë takim trepalësh, sepse Vuçiqit i është bërë e qartë se Sorensen është një ekspert i hershëm i politikës serbe dhe manipulimi i studentit të Millosheviqit, Aleksandar Vuçiç, nuk mund të kalojë nën radarin e Sorensen.
Megjithatë, as shpresat e Vuçiçit dhe as të Putinit në këtë kuptim nuk do të realizohen, sepse Amerika nuk është vetëm Trump, por një sistem jashtëzakonisht kompleks. Shumë shpejt, në këtë kuptim, gjërat do të kthehen në rrjedhën natyrale të gjërave”, përfundoi Cedomir Stojkoviq për “Bota sot”.
