Ndërkombëtarët vijojnë të bëjnë apel ndaj partive politike për lista të pastra kandidatësh për zgjedhjet e 25 prillit. Ndërsa ambasadorja Yuri Kim trokiti në derën e KQZ-së, duke u takuar me kryekomisionerin Celibashi, ambasadori i BE-së, Luigi Soreca ka dhënë shfrytëzuar një takim të shoqërisë civile për të lëshuar “ultimatumin”.
Ambasadori i BE, Luigi Soreca i ka dërguar një mesazh të qartë krerëve të partive politike në Shqipëri, kur na ndajnë edhe dy muaj nga zgjedhjet parlamentare.
Ashtu si SHBA, diplomati i BE kërkon që të kandidohen persona me integritet.
"Drejtuesit e partive kanë një përgjegjësi ligjore dhe morale për të siguruar listat e kandidatëve me standardet më të larta të integritetit.", shkruan Soreca në rrjetet sociale.
Më herët, gjatë një takimi me përfaqësues të shoqërisë civile Soreca tha se vendi meriton deputetë që do të mbështesin agjendën e reformave europiane për luftën kundër korrupsionit dhe krimit të organizuar
“Vendi meriton deputetë që do të mbështesin agjendën e reformave europiane për luftën kundër korrupsionit dhe krimit të organizuar. Zgjedhjet janë të ndryshme në çdo shtet të Bashkimit Europian, por thelbi është që qytetarët vendosin bazuar tek oferta politike. Është edhe më e thjeshtë se kaq, ka të bëjë me vetë qytetarët, cilësinë e jetës së tyre, të ardhmen dhe aftësisë së tyre për të ndikuar tek ajo, përmes votës”, tha ai.
