Ish volejbollistja e shquar, Mimoza Shkodra, ka emocionuar me një shkrim për vajzën e saj, Megi Bislimi, e cila është talente e volejbollit dhe me sukses luan në kampionatin turk
Mimoza është krenare që vajza e saj po arrin suksese dhe beson e shpreson se do të paraqitet në nivele më të larta.
Edhe babai i Megit ka qenë basketbollist i spikatur, ai është Arben Bislimi.

Megi Bislimi
“U largove e vogël, por u bëre e madhe bij e mamit.
Kampionja e sakrificës dhe e zemrës.
Në moshën kur shumica ende kërkojnë veten, ti u nise rrugëve të sakrificës, larg prej nesh, por me ëndrra të mëdha në zemër.
Sot, u shpalle kampione në kategorinë Yildiz në Turqi, duke e vendosur emrin tënd lart – jo vetëm si sportiste, por si shembull force, përkushtimi e elegance.
Në fushë, nuk isht vetëm një lojtare – ishe zemra e ekipit. Me qetësinë, energjinë dhe vizionin Tënd udhëhoqe çdo aksion si një kampione e lindur. Sot, tregove që je lojtare domethënëse duke treguar se talenti nuk është rastësi, por rezultat i shpirtit luftarak, punës së palodhur dhe dashurisë për lojën.
Por ajo që na emocionon më shumë është se, përveç fushës së volejbollit, ti po shkëlqen edhe në shkollë – me nota të larta, etikë dhe vlera që vetëm një vajzë e edukuar me dashuri mund t’i ketë.
Je dëshmia se nuk duhet të jesh afër për të na bërë krenarë – mjafton të jesh vetja jote, një vajzë e fortë, e mirë, e dashur dhe e palodhshme.
Një pjesë e zemrës sime po rritet larg… por sot ajo pjesë u bë kampione.
Nuk ka titull më të madh se të jem nëna e një vajze si ti.
Ti je kampionia ime e jetës!
Faleminderit që je ti Megi Bislimi”, ka shkruar Mimoza.