Pas një karriere 28-vjeçare në volejbollin aktiv, Habil Ajeti tashmë i është bashkuar shtabit teknik të Kombëtares A të meshkujve të Kosovës, duke sjellë eksperiencën, profesionalizmin dhe bagazhin e tij të pasur në shërbim të “Dardanëve”.
“Habil Ajeti do t’i bashkohet përzgjedhësit malazez Darko Prebiracevic dhe asistentit të tij Valon Mustafa, duke e bërë shtabin teknik të Kombëtares edhe më të fuqishëm me praninë e një emri që ka lënë gjurmë të pashlyeshme në volejbollin shqiptar.
Përvoja e tij nuk ndalet vetëm si lojtar.
Ajeti për një periudhë ka qenë edhe ndihmës trajner në përfaqësuesen e Maqedonisë së Veriut, ndërsa angazhimi i tij te Kombëtarja e Kosovës konsiderohet një asset i madh për zhvillimin dhe avancimin e ekipit kombëtar.
I njohur për cilësitë e tij si korrektor dhe lider në parket, Habil Ajeti gjatë karrierës së tij ka qenë pjesë e disa prej klubeve më të njohura shqiptare dhe evropiane:
Shkëndija Tetovë
KEK-u
Mabetexi
Drenica
Rabotniçki Shkup
Studenti Tiranë
Pallavolo Lugano
Shutova Kërçovë
Luboteni Ferizaj
Skënderbeu Kraishtë
Me këto skuadra, ai u shpall kampion dhe fitues i Kupës në disa vende, duke ndërtuar një karrierë që frymëzoi gjenerata të tëra volejbollistësh shqiptarë.
Federata e Volejbollit e Kosovës e falënderon Habil Ajetin për kontributin e tij të jashtëzakonshëm në volejboll dhe i uron shumë suksese në kapitullin e ri me Kombëtaren A të Kosovës”, ka bërë të ditur FVK.