Më 29 nëntor, qytetarët zviceranë, përfshirë dhjetëra mijëra shqiptarë me shtetësi zvicerane, vendosin për katër çështje federale. Ja çfarë është në votim dhe si qëndrojnë sondazhet e fundit.
1. TVSH-ja për pensionin e 13-të AHV
Qeveria dhe Parlamenti propozojnë rritjen e TVSH-së me 0,4 pikë përqindjeje për të financuar pensionin e 13-të, i cili i kushton sigurimit pensional 4 deri në 5 miliardë franga në vit. Disa produkte të përditshme, si ushqimet dhe barnat, nuk do të preken nga rritja. Sipas sondazhit të dytë të Tamedia-s, shumica ende e kundërshton propozimin, ndonëse mbështetja është rritur. Edhe sondazhi i SRG-së tregon epërsi të ngushtë të "Jo"-së. Pensioni i 13-të paguhet për herë të parë në dhjetor, pavarësisht rezultatit.
2. Ligji për materialet luftarake
Ndryshimi i rregullave për eksportin e armëve është çështja më e pasigurt. Sipas Tamedia-s, dy kampet janë thuajse të barabarta.
3. Nisma për fishekzjarrët
Nisma kërkon ndalimin e shitjes dhe përdorimit të fishekzjarrëve me zhurmë, me përjashtim të shfaqjeve të mëdha të autorizuara. Sipas SRG-së, 63 për qind e votuesve janë pro. Qeveria është kundër.
4. Nisma e Mitte-s për tatimimin e çifteve
Nisma e partisë Mitte për tatimimin e çifteve të martuara ka pak gjasa të kalojë. Sipas Tamedia-s, 59 për qind e votuesve janë kundër. Shumë prej tyre arsyetojnë se Zvicra sapo ka vendosur për tatimimin individual.
Si votohet
Shumica e votuesve në Zvicër votojnë me postë. Materiali i votimit duhet të arrijë te komuna në kohë, ndaj këshillohet që zarfi të dërgohet disa ditë para afatit.