Kantonet zvicerane kërkojnë që reforma e financimit të sigurimit shëndetësor të ulë barrën e primeve nga viti 2028. Kërkesa vjen nga Konferenca e Drejtorëve Kantonalë të Shëndetësisë (GDK).
Nga viti 2028 hyn në fuqi sistemi i financimit të njëtrajtshëm EFAS. Me të, kantonet do të bashkëfinancojnë edhe shërbimet ambulantore, jo vetëm trajtimet në spital. GDK kërkon që shpenzimet shtesë të kantoneve të kthehen drejtpërdrejt në primet, duke i ulur ato ose duke ngadalësuar rritjen e tyre. Sipas GDK-së, reforma duhet të jetë neutrale në kosto për të siguruarit dhe nuk duhet t’i ngarkojë vetëm tatimpaguesit.
Sipas llogarive të Zyrës Federale të Shëndetësisë (BAG) nga nëntori 2025, kantonet do të kishin pasur mbi 800 milionë franga kosto shtesë nëse reforma do të kishte nisur në vitin 2024. GDK pret që barra reale në 2028 të jetë edhe më e madhe, sepse trajtimet ambulantore dhe kostot e përgjithshme vazhdojnë të rriten.
Kryetari i GDK-së, Lukas Engelberger, kërkoi transparencë: “Efektet e kalimit në EFAS duhet të paraqiten sa më transparent.” Nënkryetari Pierre Maudet tha se ata që paguajnë edhe taksa, edhe prime, duhet ta kuptojnë si ndikojnë kontributet më të larta kantonale te primet e tyre.
GDK kërkon gjithashtu nga BAG që vitin e ardhshëm ta shqyrtojë me kujdes caktimin e primeve për 2028 dhe që të dhënat federale të përditësohen sa më shpejt.