Një ngjarje tragjike ka ndodhur këtë të shtunë në Greqi, ku një shtetas shqiptar, 55 vjeç, ka humbur jetën në një aksident në zonën e quajtur “Pirgos Ilias”, në Peloponez.
Sipas policisë greke, viktima është 55-vjeçari Fatmir Dyrmishi, i cili po lëvizte me biçikletë në një kryqëzim në hyrje të qytetit. Në rrethana ende të paqarta, ai është përplasur nga një kamion, duke marrë plagë të rënda.
Shqiptari u transportua me urgjencë në spital, por nuk arriti t’u mbijetojë plagëve të marra.
Trupi i tij është dërguar në morgun e spitalit, ndërsa policia greke po heton rrethanat e aksidentit. Deri më tani, është shoqëruar drejtuesi i kamionit.
Mësohet se viktima ishte banor i zonës, ndërsa familja e tij jeton në Shqipëri.