Rama anulon vizitën në Vjenë, vetëm pak ditë pas protestës së diasporës

Diaspora

Rama anulon vizitën në Vjenë, vetëm pak ditë pas protestës së diasporës

Më: 18 tetor 2026 Në ora: 16:52

Kryeministri Edi Rama nuk do të shkojë të hënën në Austri. Kancelaria Federale e Austrisë njoftoi se vizita zyrtare te kancelari Christian Stocker u anulua nga pala shqiptare.

Vizita zyrtare e kryeministrit shqiptar Edi Rama në Vjenë, e planifikuar për të hënën, më 19 tetor, nuk do të zhvillohet.

Kancelaria Federale e Austrisë njoftoi të dielën pasdite, përmes një komunikate, se vizita e Ramës te kancelari Christian Stocker “është anuluar nga pala shqiptare”. Në njoftim nuk jepet asnjë arsye. Deri në momentin e publikimit, qeveria shqiptare nuk e kishte komentuar vendimin. 

Rama pritej të mbërrinte në orën 12:00 në Ballhausplatz, ku Stocker do ta priste me nderime ushtarake. Media austriake e prisnin me interes takimin, duke pyetur nëse kancelari do t’i prekte protestat në Shqipëri dhe akuzat për korrupsion.

Diaspora kishte protestuar në Vjenë

Anulimi vjen pak ditë pasi shqiptarët në Austri marshuan nëpër qendrën e Vjenës kundër qeverisë së Ramës. Në krye të kolonës mbahej pankarta “Protect EU values – hold Albania’s government accountable”. Një vajzë mbante mesazhin “Rama, you’re killing our future” (“Rama, po na vret të ardhmen”). Bota Sot e ka raportuar këtë protestë më herët sot. 

Protestat në Shqipëri vazhdojnë

Vendimi merret ndërsa në Tiranë dhe në disa qytete të tjera protestat e udhëhequra nga studentët vazhdojnë prej gati një jave. Protestuesit kërkojnë dorëheqjen e Ramës. Ata ankohen për tarifat e larta universitare, kushtet e dobëta në arsim, mungesën e vendeve të punës dhe korrupsionin.

Gjatë përplasjeve me protestuesit, policia ka përdorur gaz lotsjellës, ujë me presion dhe plumba gome. Rama ka refuzuar të japë dorëheqjen dhe ka fajësuar “duar të huaja” për trazirat.

Lajmi është në zhvillim.

Sot mund të lexoni Shfletoni kopertinat