Vr*sja e shqiptarit në Itali, gjykata konfirmon arrestimin, italiani mbetet në burg

Diaspora

Vr*sja e shqiptarit në Itali, gjykata konfirmon arrestimin, italiani mbetet në burg

Më: 31 tetor 2026 Në ora: 19:00
Daniele Sartini

Gjykata e Forlit në Itali ka konfirmuar arrestimin e Daniele Sartinit, 29-vjeçarit nga Longiano, i akuzuar për vrasjen e shqiptarit Denaldo Maxhalaku, 31 vjeç, dhe fshehjen e trupit të tij. Pas seancës së zhvilluar të shtunën, më 31 tetor, gjyqtari i hetimeve paraprake (GIP) vendosi të lërë në fuqi masën e sigurisë ‘arrest me burg’.

Sartini ndodhet në burgun e Forlit që prej së mërkurës, ndërsa me vendimin e fundit konfirmohet vazhdimi i paraburgimit.

Sipas rindërtimit të ngjarjes nga hetuesit, krimi dyshohet se ka ndodhur për shkak të një borxhi droge prej rreth 1.000 eurosh. Shqiptari 31-vjeçar kishte shkuar për të kërkuar shlyerjen e borxhit, por dyshohet se u qëllua për vdekje me armë zjarri nga 29-vjeçari.

Pas vrasjes, autori i dyshuar dyshohet se e hodhi trupin e viktimës në një pus, ndërsa më pas i vuri flakën automjetit të Maxhalakut.

Sipas Prokurorisë së Forlit, Sartini ka pranuar krimin. Rrëfimi i tij është cilësuar nga organi i akuzës si ‘i plotë dhe i detajuar’.

Me konfirmimin e arrestit, 29-vjeçari do të vijojë të qëndrojë në burg, ndërsa hetimet për zbardhjen e plotë të rrethanave të vrasjes vazhdojnë.

Sot mund të lexoni Shfletoni kopertinat