Gjykata Sportive Italiane ka vendosur të mos dënojë trajnerin e Interit, Antonio Konte dhe presidentin e Juventusit, Andrea Anjeli pas përplasjeve të ashpra në sfidën e fundit të Kupës së Italisë, Juventus-Inter. Madje, edhe pse kamerat në fushën e “Allianz Stadium” regjistruan sjelljen e të dy palëve, incidenti në fjalë nuk është përmendur aspak.
Edhe dy zyrtarët e klubeve, drejtori sportiv i Juventusit Fabio Paratiçi dhe ai teknik i Interit, Gabriel Oriali nuk kanë marrë penalitete. Megjithatë, këto vendime janë për momentin, pasi nëse pranohen fakte dhe prova të reja, mund të merret një vendim i ri.
Ndërkohë, është konfirmuar se dhe mbrojtësi i majtë i Juventusit, Aleks Sandro nuk do të luajë në finalen e Kupës së Italisë kundër Atalantës pasi plotësoi numrin e kartonave të verdhë.
Takimi mes bardhezinjve dhe zikaltërve regjistroi episode të shëmtuara jashtë fushe, ku Konte u tregoi gishtin e mesit drejtuesve të Juventusit, ndërsa Anjeli shfryu ndaj ish-trajnerit të tij me fjalë banale.
