Juventusi nuk ka zgjidhur ende disa telashe që mbajnë peng merkaton e klubit, si rinovimin e Dibala apo firmën me Morata. Por ndërkohë, klubi bardhezi po punon për të ardhmen dhe po piketon përforcime të reja për edicionin e ardhshëm.
Nga Anglia vijnë zëra të vazhdueshëm për interesimin e bardhezinjve për Pol Pogba. Po ndërkohë në Itali insistohet se objektivi i vërtetë i mesfushës është një lojtar tjetër.
Italiani Zhorzhinjo duket se është gati të largohet nga Premier Liga pas 4 viteve në radhët e Çelsit dhe Juventusi ka nisur kontaktet për të siguruar firmën e tij.
“La Gazzetta dello Sport” bën të ditur se Juventusi mendon të përfitojë nga një dekret qeveritar që do ta ndihmojë për të amortizuar rrogën e futbollistit, duke paguar vetëm 50% të taksave për të.
Kështu, rroga prej 6 milion eurosh në sezon që kërkon futbollisti, do t’i kushtonte vetëm 9 milionë euro bruto, shumë më pak se sa disa eksperimente të viteve të fundit që kanë rezultuar të dështuar, si Ramsej apo edhe Rabio.
