Përveç lamtumirës së kapitentit Chiellini, Juventus nuk ka rinovuar as kontratat e Paulo Dybala dhe Federico Bernardeschi-t për sezonin e ardhshëm.
Për Bernardeschi-n duket se është vënë në lëvizje Napoli. Mundësia për ta marrë më kosto zero është shumë tunduese për Aurelio de Laurentiis.
Edhe vetë lojtari duket se është shprehur i gatshëm për një transferim te rivalët e Zonjës së Vjetër dhe, sipas Il Mattino, ka arritur një marrëveshje në vija të përgjithshme për rrogën.
Nëse presidenti De Laurentiis do të jetë i gatshëm t’i ofrojë një rrogë prej 3 milionë eurosh në sezon, Bernardeschi do të nënshkruante menjëherë.
Napoli, për të shmangur surpriza të këqija, mund të vendosë ta përshpejtojë operacionin. Megjithatë, mbyllja e operacionit duket s e nuk është edhe aq afër.
Në fakt, drejtori sportiv Giuntoli duket se po vlerëson edhe opsione të tjera në rast se nuk do të arrihej marrëveshja me kampionin e Europës.
