Eliminimi i Gjermanisë qysh në fazën e grupeve të Kupës së Botës 2022 po i bën njerëzit të flasin, ka bërë bujë në mbarë botën. Megjithatë, jo të gjithë kanë analizuar vetëm shkaqet dhe arsyet e asaj që ndodhi. Ka nga ata që kanë shkuar më tej.
Në një emision televiziv të quajtur “Çështjet e Katarit”, kombëtarja gjermane u tall dhe u poshtërua nga drejtuesit dhe prezantuesit e tij, të cilët mbuluan gojën me njërën dorë dhe me dorën tjetër bënin shenjë talljeje me protestën e lojtarëve të “Die Mannschaft” para ndeshjes me Japoninë (vunë duart mbi gojë).
Me atë rast, kombëtarja gjermane kishte shprehur mospajtimin e saj kundër FIFA-s, e cila nuk i lejoi kapitenët e shtatë kombëtareve evropiane të dilnin në fushë me shiritin e ylberit ‘One Love’ në mbështetje të komunitetit LGBTQ+ dhe punëtorëve migrantë të shfrytëzuar për të ndërtuar veprat sportive në Katar.
Pas shpalljes së sanksioneve të mundshme sportive, askush nuk e mbajti atë shirit, por Gjermania, ndryshe nga kombëtaret e tjera, donte ende ta thoshte zërin e saj në fushë. Ky gjest nuk u prit mirë në Katar dhe reagimi i tyre ndaj largimit të hershëm të gjermanëve nga Botërori është dëshmi e kësaj.
Programi “Qatar Affairs” analizoi në mënyrë shumë ironike humbjen e Gjermanisë dhe në fund të gjithë të pranishmit në studio mbuluan gojën dhe përshëndetën kamerat, duke u tallur me katër herë kampionët e botës.
Gjermania përfundoi e treta në Grupin E, pas Japonisë dhe Spanjës.
Është hera e dytë në po aq Botërorë që gjermanët dështojnë të kalojnë fazën e grupeve, pas asaj që ndodhi në “Rusia 2018”. Pas fitores së vitit 2014 në Brazil, kombëtarja gjermane nuk e ka përmbushur më statusin e saj. Këto dy eliminime të njëpasnjëshme që në grupe mund të çojë në një ndryshim të vërtetë brezash të “Die Mannschaft”.
