Milan Skriniar po kalon muajt e fundit të aventurës së tij 6-vjeçare me fanellën e Interit dhe drejtuesit zikaltër kanë nisur punën për gjetur pasuesin e tij.
Tentativa e parë u bë që në janar për francezin e Bayernit, Benjamin Pavard, megjithatë bavarezët refuzuan, duke shtyrë gjithçka për në verë.
Pikërisht Pavard është objektivi primar i zikaltërve, që do të provojnë sërish në verë, duke ofruar 20 milionë euro për Bayernin e Mynihut.
Në favorin e milanezëve është edhe fakti që kontrata e francezit me Bayernin skadon në verën e 2024-ës dhe një vit më herët, bavarezët nuk mund të pretendojnë shuma të mëdha.
Një tjetër alternativë, që gjithashtu vjen nga Bundesliga, është francezi i Eintracht Frankfurt, Ndicka, i cili në verë do të jetë lojtar i lirë dhe josh jo pak zikaltrit.
Megjithatë problem mbetet fakti që Ndicka është mëngjarash dhe jo fort i përshtatshëm për krahun e djathtë të mbrojtjes me tre që përdor Inzaghi.
Alternativa e fundit, por jo më pak e rëndësishme është ajo e portugezit të Lille, Djalo, por këtu problem mbeten pretendimet e francezëve, që kanë çuar çmimin e tij në 35 milionë euro, shifër kjo jashtë parametrave të zikaltërve.
Deri në merkaton e verës ka ende shumë kohë përpara, por Marotta e Ausilio e dinë se duhet të punojnë shumë, pasi do të duhet të rindërtojnë një repart nga e para.
Kjo pasi përveç Skriniar, pritet të largohet edhe D’Ambrossio, teksa në dyshim janë De Vrij që i skadon kontrata e Acerbi, që i përfundon huazimi.
Momentalisht e vetmja pikë e qëndrueshme në repart është Bastoni, por edhe situata e tij mund të ndryshojë, pasi italianit i skadon kontrata në verën e 2024-ës dhe nëse nuk rinovon deri në maj, atëherë do të nxirret në shitje, për të shmangur një situatë të njëjtë si ajo me Skriniar.
