Test i vërtetë për Milanin në Kupë

Futboll

Test i vërtetë për Milanin në Kupë

Më: 23 shtator 2025 Në ora: 14:25
Milani

Kupa e Italisë rikthehet në qendër të vëmendjes me një përballje interesante: Milani i Max Allegrit kundër Lecce-s së ish-lojtarit Camarda, ndeshje që do të vendosë se kush do të kalojë në fazën e 1/8-ve, ku fituesin e pret Lazio.

Pas fitores ndaj Barit në raundin e parë dhe suksesit të fundit në kampionat ndaj Udineses, ku arriti fitoren e tretë radhazi, Milani kërkon të vazhdojë momentin pozitiv edhe në kupë.

Megjithatë, kalendari i ngjeshur i detyron kuqezinjtë të bëjnë rotacion. Allegri, ende i pezulluar, duhet të menaxhojë mungesat e rëndësishme të Leaos dhe Jasharit, ndërsa përballë ka sfida të vështira me emra si Napoli, Juventus, Fiorentina dhe Atalanta. Për këtë arsye, priten ndryshime në formacion:

Maignan kthehet titullar në portë, në mbrojtje do ketë vend për De Winter, ndërsa në mesfushë do pushojnë Modric dhe Loftus-Cheek, me lojtarë Fofana, Ricci e Rabiot titullarë. Sulmi do të udhëhiqet nga Nkunku, që pritet të debutojë nga minuta e parë, në krah të Gimenez-it.

Nga ana tjetër, Lecce i Di Francescos është në krizë dhe ende pa fitore. Trajneri synon të japë hapësirë lojtarëve të rinj, me Coulibaly dhe Helgason në mesfushë, ndërsa në sulm do luajë Camarda i mbështetur nga Tete Morente dhe N’Dri.

Për verdhekuqtë, sfida është tepër e vështirë, pasi nuk kanë fituar në ‘San Siro’ që nga viti 1997 dhe Kupa e Italisë nuk shihet si objektiv kryesor për shkak të situatës në kampionat.

Programi i ditës përfshin edhe dy ndeshje të tjera: Cagliari-Frosinone (17:00), me sardët në formë të mirë që synojnë duelin ndaj Napolit në 1/8, si dhe Udinese-Palermo (18:30), ku friulanët kërkojnë rikthimin pas humbjes me Milanin, por rrezikojnë përballë një Palermoje në formë të shkëlqyer në Serinë B, të udhëhequr nga Pippo Inzaghi.

comment Për komente lëvizni më poshtë
Sot mund të lexoni Shfletoni kopertinat