Fermín Lopez rrëfen të kaluarën

Futboll

Fermín Lopez rrëfen të kaluarën

Më: 24 shtator 2025 Në ora: 14:55
Fermín Lopez

Mesfushori i Barcelonës, Fermín Lopez, ka folur hapur për përvojat e tij në një intervistë të dhënë për RAC1, ku ka rrëfyer vështirësitë e para në La Masia, marrëdhënien e tij me Gavin dhe të ardhmen te klubi katalanas.

Fermín kujtoi momentin kur për herë të parë la shtëpinë për t’iu bashkuar akademisë së famshme të Barcelonës:

“Dita ime e parë në La Masia ishte më e keqja e jetës sime. Ishte hera e parë që largohesha nga shtëpia dhe qava shumë,” – tha ai.

Barça e kishte vëzhguar lojtarin që në moshën 11-vjeçare, por babai i tij nuk pranoi transferimin duke e konsideruar shumë të vogël.

Vetëm dy vite më vonë, klubi u rikthye me një tjetër ofertë që, siç shprehet ai, “ishte treni i fundit”.

Me gjithë vështirësitë, Fermín tregon se arriti të përshtatej:

“Na u desh kohë, por krijuam një grup shumë të mirë me Xavi Simons dhe djem të tjerë.”

Marrëdhënia me Gavin

Në javët e fundit ishte përfolur për një tension mes tij dhe Gavit, por mesfushori nga El Campillo i hodhi poshtë këto zëra:

“Ne e njohim njëri-tjetrin që prej moshës 13-vjeçare dhe nuk ka asnjë problem. Është një nga miqtë e mi më të mirë në dhomat e zhveshjes, ashtu si Pedri, Balde, Eric dhe Dani. Dalin gjithmonë gjëra, por askush nuk e di çfarë ndodh brenda. Futbollistët duhet të jenë mendërisht gati për këto situata.”

E ardhmja te Barça

I pyetur për të ardhmen e tij dhe mundësinë për t’u larguar gjatë merkatos së fundit, Fermín u shpreh qartë:

“Nuk e kam menduar kurrë largimin. Gjithmonë kam qenë tifoz i Barcelonës. Patjetër që kishte oferta, por asnjë nga Real Madridi. Klubi nuk donte të më shiste dhe unë nuk doja të largohesha.”

Formë e mirë, por i ndalur nga dëmtimi

Pas një vere të pasigurt, Fermín López mbeti në skuadrën e parë të Barcelonës dhe ka qenë protagonist në këtë fillim sezoni, duke u aktivizuar titullar në pesë nga gjashtë ndeshjet e para. Megjithatë, fatkeqësisht, në minutat e fundit të përballjes kundër Getafes pësoi një dëmtim dhe do të qëndrojë jashtë fushave për të paktën tri javë.

comment Për komente lëvizni më poshtë
Sot mund të lexoni Shfletoni kopertinat