Di Natale: Lewandowski në Itali?

Futboll

Di Natale: Lewandowski në Itali?

Më: 1 maj 2026 Në ora: 19:12
Di Natale

Ish-sulmuesi italian, Antonio Di Natale, ka folur me superlativa për ‘bomberin’ polak Robert Lewandowski, duke theksuar se ai do të kishte ndikim të menjëhershëm në Serinë A nëse do të transferohej në Itali.

Në një intervistë për “La Gazzetta dello Sport”, Di Natale u shpreh se, pavarësisht moshës 37-vjeçare, Lewandowski mbetet një nga sulmuesit më të frikshëm në futbollin europian dhe do të vazhdonte të ishte vendimtar edhe në Itali.

“Do të doja ta shihja Lewandowskin në Itali vitin e ardhshëm. Unë u tërhoqa në moshën 38-vjeçare, ai është 37 dhe është një ‘bomber’ i jashtëzakonshëm: në Serinë A do të shënonte edhe për dy sezone të tjera, madje duke luajtur me cigare në gojë”, tha me ironi ish-sulmuesi italian.

Aktualisht, Lewandowski është pjesë e Barcelonës, por kontrata e tij skadon më 30 qershor, duke hapur mundësinë e një transferimi të mundshëm gjatë verës.

Prej muajsh, emri i tij është lidhur me interesim nga dy gjigantë të futbollit italian, Milan dhe Juventus, të cilët raportohet se kanë zhvilluar edhe kontakte paraprake me përfaqësuesit e lojtarit.

Sipas Di Natale-s, ardhja e Lewandowskit në Itali do të ishte një goditje e madhe për kampionatin dhe një garanci për gola të menjëhershëm, duke sugjeruar madje një kontratë dyvjeçare si zgjidhjen ideale për klubet që kërkojnë eksperiencë dhe cilësi në sulm.

comment Për komente lëvizni më poshtë
Sot mund të lexoni Shfletoni kopertinat