Kapiteni i kombëtares së Zvicrës, Granit Xhaka, nuk dëshiron t’ia hedhë fajin vapës, por thotë se tani është koha për të nxjerrë mësimet para ndeshjes së ardhshme kundër Bosnjë-Hercegovinës.
Barazimi me rezultat 1:1 me Katarin në kuadër të Grupit B në kuadër të Kampionatit Botëror, ishte zhgënjyes për Zvicrën.
Kapiteni foli hapur. Fillimisht kritikoi mungesën e disiplinës në intervistën për “SRF”, ndërsa më pas e theksoi sërish në bisedën me gazetarët në zonën mikse.
Granit, sa keq ndihet ky rezultat?
Granit Xhaka: Nuk jemi të kënaqur, e kishim imagjinuar ndryshe. Por në futboll gjithmonë ka anë të bukura dhe negative.
Kështu ka qenë tani, në të kaluarën dhe do të mbetet edhe në të ardhmen. Kur nuk i shënon golat, i pranon. Është për të ardhur keq, por ne shikojmë përpara.
A ishte vapa një faktor?
Granit Xhaka: Jo.
Çfarë ndodhi në pjesën e dytë? Në të parën ishit shumë dominues. A u përshtat kundërshtari?
Granit Xhaka: Pjesa e parë ishte shumë e mirë, krijuam raste. Në të dytën nuk e gjetëm më ritmin që na kishte bërë të fortë. Nuk patëm mjaftueshëm disiplinë në pozicione të ndryshme. Dhe kur nuk ke disiplinë në fushë, nuk mund ta mposhtësh as Katarin.
A nuk ishit me qasjen e duhur në fushë?
Granit Xhaka: Jo.
Kjo nuk ka të bëjë me qasjen. Në pjesën e parë luajtëm futboll të mirë dhe krijuam raste.
Po t’i kishim shfrytëzuar, askush nuk do të fliste për këtë ndeshje. Portieri i Katarit bëri një ndeshje të klasit botëror.
Në futboll duhet t’i japësh respekt edhe Katarit. Ata e menaxhuan shumë mirë pjesën e dytë, pritën momentin e tyre dhe e morën.
A e kishit menduar të mundshëm një rezultat të tillë para ndeshjes?
Granit Xhaka: Në futboll gjithçka është e mundur.
A ndihet si humbje?
Granit Xhaka: Çdo barazim ndihet si humbje. Paraqitja nuk ishte mjaftueshëm e mirë për të fituar.
A do të reagoni në ndeshjen e ardhshme kundër Bosnjë-Hercegovinës?
Granit Xhaka: Duhet. Tani mund të rikuperohemi, të fshijmë duart dhe të nxjerrim mësimet.
Si i përjetuat tifozët këtu në SHBA?
Granit Xhaka: Ishte shumë mirë, faleminderit të gjithëve që erdhën në stadium.
Sinqerisht nuk e prisja që do të kishte kaq shumë tifozë. Kjo tregon se ky vend e do futbollin dhe ne u përpoqëm t’u ofrojmë spektakël.
Shpresoj që herën tjetër ta bëjmë pak më mirë. Ndonjëherë rezultate të tilla janë të mira për kokën, që të rikthehesh në realitet.