Mykhailo Mudryk mund të largohet nga Chelsea në formë huazimi, vetëm pak javë pasi iu hoq pezullimi për doping.
Sulmuesi anësor ukrainas, 25-vjeçar, nuk ka zhvilluar ndeshje zyrtare që nga nëntori i vitit 2024, pasi rezultoi pozitiv për substancën e ndaluar meldonium.
Pas rikthimit në futboll, Mudryk ka lënë përshtypje pozitive në fazën përgatitore të Chelseat. Ai asistoi në fitoren e së dielës ndaj Johor Darul Ta'zim, duke kërkuar të bindë trajnerin e ri, Xabi Alonso, se mund të ketë një rol të rëndësishëm në skuadër.
Alonso javën e kaluar kishte deklaruar se është ende herët për të vlerësuar nëse Mudryk do të mund të ketë një ndikim të madh te Chelsea, por trajneri spanjoll ka shprehur kënaqësinë për rikthimin e lojtarit pas një periudhe të gjatë dhe të vështirë jashtë fushës.
Megjithatë, sipas gazetarit Fabrizio Romano, Chelsea është i hapur për ofertat për huazimin e Mudrykut, në mënyrë që ukrainasi të ketë mundësi të luajë rregullisht dhe të rikthehet gradualisht në ritmin e futbollit të nivelit të lartë.
“Chelsea është i hapur të shqyrtojë ofertat për huazimin e Mykhailo Mudrykut, në mënyrë që ai të luajë rregullisht pas rikthimit”, ka raportuar Romano.
Ai ka shtuar se klubet italiane dhe RC Strasbourg janë ndër opsionet për lojtarin, por preferenca e Mudrykut do të ishte të huazohej te një klub i Premier League.
“Klubet italiane, si dhe RC Strasbourg, janë opsione, por kuptohet se preferenca e Mudrykut do të ishte një huazim te një klub i Premier League”, ka bërë të ditur Romano.
Mudryk ka punuar intensivisht gjatë periudhës së gjatë jashtë futbollit. Ai kishte angazhuar një trajner personal, ndërsa kishte organizuar edhe seanca stërvitore me portierë dhe futbollistë të tjerë në stadiumin “Honeycroft”, shtëpia e klubit të kategorisë së shtatë, Uxbridge FC.
Tani, pas rikthimit në fushë, Mudryk mund të ketë mundësinë të fitojë minuta të rregullta diku tjetër, me një huazim që do t'i shërbente si mundësi për të rikthyer formën dhe për t'i dhënë një tjetër shtysë karrierës së tij.
