Sherif Topalli jep dorëheqje nga pozita e kryetrajnerit të klubit të futbollit Tefik Çanga nga Tërni.
Tefik Çanga është në krizë të rezultateve në tri ndeshjet e para të edicionit të ri në Ligën e Parë të Kosovës.
Tri ndeshje, ka një barazim dhe dy humbje, duke u renditur në vend të fundit me një pikë.
“Pas afro tre viteve të një rrugëtimi të përbashkët, kam marrë vendimin të jap dorëheqje nga pozita e kryetrajnerit të klubit.
Dua të shpreh falënderimin tim të sinqertë për kryesinë e klubit, futbollistët, stafin dhe të gjithë ata që kanë qenë pjesë e këtij rrugëtimi, për besimin, bashkëpunimin dhe mbështetjen gjatë këtyre viteve.
Gjatë kësaj periudhe kemi kaluar momente të rëndësishme dhe kemi arritur rezultate që do të mbeten pjesë e historisë së klubit. Nga Liga e Dytë, ku u shpallëm kampionë dhe siguruam inkuadrimin në Ligën e Parë, deri te sezoni ynë i parë në këtë rang, ku arritëm të ishim një nga skuadrat surprizë të kampionatit dhe e përfunduam sezonin në pjesën e epërme të tabelës.
Një dëshmi e punës së bërë është edhe fakti se shumë futbollistë të ekipit u transferuan në klube të tjera, ndërsa disa të tjerë vazhduan të jenë pjesë e skuadrës falë punës, besimit dhe mbështetjes që iu është dhënë gjatë kësaj periudhe.
Vendimi im për t’u larguar vjen për arsye profesionale , duke vlerësuar se në këtë moment është koha e duhur që rrugët tona profesionale të ndahen.
E bëj këtë hap me respekt të plotë për klubin dhe me bindjen se puna dhe rezultatet e arritura gjatë këtyre viteve flasin vetë.
I uroj klubit shumë suksese në vazhdim dhe falënderoj edhe një herë të gjithë ata që më kanë qëndruar pranë gjatë këtij rrugëtimi.
Nga sot, si gjithmonë, mbetem i hapur për sfida të reja profesionale, oferta dhe projekte të reja, me synimin për të vazhduar rrugëtimin tim në nivele edhe më të larta të futbollit”, ka njoftuar Topalli.