Në Kosovë janë rreth 40 mijë përdorues të substancave narkotike

Lajme

Në Kosovë janë rreth 40 mijë përdorues të substancave narkotike

Më: 10 mars 2022 Në ora: 22:49
Foto ilustrim

Në Kosovë llogaritet se janë rreth 40 mijë përdorues të substancave narkotike.

Personat përgjegjës që merren me rehabilitimin e këtyre njerëzve, thonë se droga e tipit kokainë është në treg e që mosha e përdoruesve ka rënë ndër vite.

Rreth 40 mijë llogaritet të jetë numri i përdoruesve të substancave narkotike në Kosovë. Mosha mesatare e atyre që abuzojnë me këto substanca nga viti në vit ka shënuar rënie. Aktualisht mosha më e re që abuzon me droga është 16 vjeç, dhe përdoret lloji i drogës marihuanë. Ndërkaq për sa i përket llojit kokainë, mosha e përdoruesve ka rënë nga 37 vjeç sa ishte në 26 vjeç.

Kështu thotë për Radio Kosovën Safet Blakaj nga Qendra Mediko-Psikoterapeutike “Labirint”.

’’Trendi i përdorimit të drogave në Kosovë është që droga e tipit heroinë ka rënë shumë por kanabisi është në vendin e parë. Më pas vjen droga e tipit kokainë e që po shënon përdorim të shpejtë e rënie të moshës. Nëse llogaritet para tri viteve mosha mesatare ka qenë 37 vjeç, ndërkaq në vitin 2021 ka qenë 26 vjeç, e që është shumë shqetësuese’’, thotë Blakaj.

Sipas Blakaj, në qendrën ‘Labirint’ që ai e udhëheq ndihmë mjekësore që nga fillimi i punës kanë kërkuar mbi 2 mijë persona, e që vlerësohet që janë pak krahasuar me përdoruesit e substancave narkotike që i ka vendi.

’Numri i përgjithshëm i të regjistruarve në qendër që kanë kërkuar ndihmë mjekësore është 2 mijë e 723, përfshirë të gjitha drogat. Sipas të dhënave në teren del se numri i përdoruesve të përgjithshëm është rreth 40 mijë përdorues’’, tha ai

Psikologët në vend shpjegojnë arsyet e përdorimit të substancave narkotike te të rinjtë.

Arlinda Gashi, psikologe, duke folur për Radio Kosovën tha se përdorimi i substancave narkotike lidhet edhe me gjendjen emocionale.

“Studimet flasin për përdoruesit e substancave narkotike ku kanë gjetur një ndërlidhje me depresionin e personave që vendosin të futen në këto ujëra. Ka tendencë që personat që përjetojnë depresion janë më të hapur ndaj përdorimit për të ikur nga gjendja reale e tyre emocionale e që i shtyn deri në varësi’’, tha ajo.

Ndërkaq autoritetet e rendit përmes postës elektronike kanë dërguar të dhënat për sasinë e substancave narkotike të konfiskuara për vitin 2021.

Aty thuhet se sasia e konfiskuar e marihuanës është 499 kg, e kokainës është 414 kg , e heroinës është 3 kg . Gjithashtu gjatë vitit 2021 janë zbuluar dhe shkatërruar 3 laboratorë te kultivimit te bimës kanabis në Regjionin e Prishtinës.

Gjatë këtij viti Policia e Kosovës ka njoftuar ditë më parë se në Terminalin Doganor të Hanit të Elezit, autoritetet kanë kapur 83.5 kilogramë drogë, që dyshohet të jetë e llojit heroinë.

Sipas tyre, deri më tani janë arrestuar shtatë persona. Droga u gjet gjatë kontrolleve të doganierëve në një maune që ishte nisur nga Turqia.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat