Profesori reagon ashpër ndaj masave të vendosura për diasporën, tregon se çfarë fshihet pas vendimit

Politika

Profesori reagon ashpër ndaj masave të vendosura për diasporën, tregon se çfarë fshihet pas vendimit

Nga: A.Morina Më: 11 shkurt 2021 Në ora: 23:26
Foto ilustrim

“Të gjithë qytetarët e Kosovës (përfshirë edhe ata me vendbanim në një shtet tjetër), gjatë hyrjes në Kosovë duhet të paraqesin vërtetim për test RT-PCR negative të bërë më së largu 72 orë para hyrjes në Kosovë, në të kundërtën duhet të izolohen për 7 ditë”.

Ky është njëri nga vendimet e Qeverisë së Kosovës , i cili gjatë ditës së sotme ka nxitur reagime të shumta. Kjo pasi, qeveria në detyrë sot lehtësoj masat në të gjitha komunat e Kosovës, derisa masat e vendosura për mërgimtarët vazhdojnë ende.

Këtë veprim analistë dhe zyrtarë të partive të tjera, e kanë parë si pengesë ndaj diasporës për të votuara në zgjedhjet e 14 shkurtit.

Lidhur me këtë çështje, profesori dhe njohësi i çështjeve politike, Sulejman Mehazi në një prononcim për gazetën “Bota sot” tha se nuk janë të logjikshme kundërveprimet ndaj mërgimtarëve.

Mehazi u shpreh se këto vendime po ndërmerren për t’ia ndaluar hovin e fitores së Albin Kurtit në zgjedhjet e 14 shkurtit.

“Turpet më të mëdha në Kosovë janë institucionet më të larta shtetërore, gjykatat, KQZ-ja, qeveria të cilët si e qysh mundohet t'ia ndalin hovin e fitores Albin Kurtit të ditës së diel të 14 shkurtit. Do të ishin të logjikshme e të arsyeshme që të gjitha këto kundërveprime institucionale qeverisëse të bëheshin ndaj dialogut me Serbinë në dobi të Kosovës e jo kundër Albin Kurtit e mërgatës së gjorë që den baba den e kanë ndihmuar Kosovën e dashur të tyre”, theksoi ai.

Profesori mbeti i habitur se si mërgimtarët që duan të votojnë duhet të vetizolohen 7 ditë, e në anën tjetër lejohen tubimet madhështore të simpatizantëve partiakë pa farë maskash në fytyrë.

“Këto veprime antinjerëzore e antihumane ndaj mërgatës, vërehet e shihet se i bënë e gjithë mafia e bashkuar institucionale për të penguar humbjet e partive të tyre të cilët njëzetvjet pareshtur e kanë rrjepur Kosovën. Si është e mundur qeveria e Hotit në largim të "burgos" në vetizolim 7 ditorë mërgimtarët që duan të votojnë e në anën tjetër lejon tubimet madhështore të simpatizantëve partiakë pa farë maskash në fytyrë, a s'është nënçmuese për mërgimtarët kjo që bën qeveria e Kosovës?! Se ata do izolohen 7 ditë se janë të koronavirusuar, e qytetarët nëpër tubime partiake nuk janë të infektuar nga koronavirusi”, deklaroi Mehazi.

Në fund, ai tha se si është e mundur që me personat që vijnë nga Serbia për të votuar në Kosovë, kanë sjellje të mirë, ndërsa ndaj mërgimtarëve shfaqin armiqësi.

“Çështë kjo armiqësi e madhe ndaj Albin Kurtit e mërgatës? Kjo tregon se mafia juridike, politike, qeverisëse e KQZ-iste janë bërë tog për të mos humbur privilegjet zhvatesë që i lufton Albini e qytetarët e Kosovës. Si është e mundur që ligji kushtetues, KQZ-ja, qeveria e Hotit të bashkohen për të keqen e jo për të mirën e qytetarëve, mërgatës e Kosovës kundër Kurtit, në anën tjetër sa të butë e nënçmues janë ndaj Listës serbe që do vijnë nga Serbia të votojnë në Kosovë. Sa e shëmtuar e sa armiqësore është vendimi i qeverisë së Kosovës, për inat pse mërgimtarët shqiptarë do votojnë Albin Kurtin i fut në izolim shtatëditor, kurse serbët që do vijnë nga Serbia do hyjnë lirshëm për të votuar Listën serbe të Vuçiqit”, përfundoi Mehazi.

Shfaq komentet
comments powered by Disqus
Sot mund të lexoni Shfletoni kopertinat