Kryeministri i Shqipërisë, Edi Rama, ka deklaruar se me dëshirë do ta votonin Hashim Thaçin për president të Shqipërisë, ani pse ky i fundit akuzohet nga Gjykata Speciale për vrasjen e shqiptarëve, shumica prej tyre anëtarë të LDK-së.
“Do të kishim vënë Hashim Thaçin dhe do të ishte president i shkëlqyer si për Shqipërinë ashtu edhe për Kosovën, dhe do ta kishim votuar me bindje dhe kënaqësi. Por ai nuk është i pranishëm, në jetën e bashkësisë qytetare, si qytetar i lirë pasi ndaj tij po zhvillohet një proces që mos më detyroni ta them këtu se çfarë procesi është”, deklaroi Rama.
E ndaj Ramës ka reaguar publicisti nga Shqipëria, Rexhep Shahu.
“Edi Rama e ka mënyrë, stil të jetuari në politikë batutën, skupin, lajmin gjysmë ndryshe. Ai çdo ditë e më shumë dyshon se është kryeministër dhe nuk beson se e ka veten në dorë. Një nga ato gjera që e nxjerr në krye lajmi të portaleve jo aq serioze është deklarimi i tij që nëse Shqipëria dhe Kosova duhet të kenë një president, ai do ta votonte me kënaqësi Hashim Thaçin dhe do të ishte një president i shkëlqyer por nuk mundet”, thotë Shahu.
Sipas tij, Edi Rama po tallet edhe me Hashim Thaçin, i cili po qëndron i burgosur në Hagë.
“Rama është kundër që Shqipëria e Kosova të kenë një president dhe ai tallet me dashamirët e kësaj ideje. Tallet edhe për faktin se Thaçi aktualisht është në gjykim dhe Rama me këtë rast synon të kapë simpatinë e dashamirëve të Thaçit dhe simpatinë e atyre që ëndërrojnë ta kenë sot një shtet të përbashkët shqiptar”, shprehet Shahu për “Bota sot”.
Përmes kësaj deklarate, Shahu thotë se Rama po tenton që ta rrisë çmimin e tij politik përmes nacionalizimit.
“Për asnjërën nga këto gjëra nuk është dakord vetë Rama. Kjo deklaratë e Ramës kërkon të rrisë çmimin e tij politik në bursën kombëtare të nacionalizmit ku ai gjithmonë është kautuar shumë poshtë. Këto janë gjëra të njohura dhe nuk ka asgjë të re nga Rama. Arsyeja e vetme e artikulimit të tillë nga Rama është jo Thaçi, por të dalë në pah Rama”, përfundon për “Bota sot”, publicisti nga Shqipëria, Rexhep Shahu.
