Ekskluzive: Eurodeputeti gjerman tregohet i ashpër me Vuçiqin: Fillo e përgatite popullatën për hapat e ardhshëm!

Politika

Ekskluzive: Eurodeputeti gjerman tregohet i ashpër me Vuçiqin: Fillo e përgatite popullatën për hapat e ardhshëm!

Arbnore Zhushi Nga Arbnore Zhushi Më 4 dhjetor 2022 Në ora: 11:57
Romeo Franz

Serbia, jo rrallë herë po e kërcënon Kosovën me luftë derisa po armatoset me armë të reja, ndërsa nga ana tjetër po kërkon “paqe” me Kosovën në tryezën e Brukselit, përmes ndërmjetësimit të Bashkimit Evropian.

Këtë qasje të Serbisë, e ka kritikuar ashpër deputeti i Parlamentit Evropian, Romeo Franz, në një intervistë ekskluzive për gazetën “Bota sot”.

I ngarkuari për marrëdhëniet me Bosnjë-Hercegovinën dhe Kosovën, ka akuzuar presidentin serb Aleksandar Vuçiq, se po bën politikë “me dy karrige”. Sipas tij, vetëm arritja e marrëveshjes gjithëpërfshirëse mes të dyja vendeve me njohjen reciproke, është thelbësore.

“Serbia dhe presidenti Vuçiq janë ende duke ndjekur qasjen e tij për një "politikë me dy karrige" midis presidentit rus dhe Bashkimit Evropian. Nuk e di se cili është qëllimi i Presidentit Vuçiq, por e di, se arritja e një marrëveshjeje gjithëpërfshirëse ligjërisht të detyrueshme të normalizimit, bazuar në njohjen reciproke, është thelbësore që të dyja vendet të përparojnë në rrugët e tyre përkatëse evropiane”, ka deklaruar eurodeputeti i të Gjelbërve.

Ai ka kërkuar nga Vuçiq që t’i jap fund politikës së tij me “dy karrige”, për një përparim në të ardhmen e afërt.

“Për presidentin Vuçiq është pra koha e fundit që t'i japë fund politikës së tij me dy karrige dhe të fillojë të përgatisë popullatën e tij për hapat e ardhshëm. Popullsia duhet të përgatitet nga të dyja anët dhe shpresoj të shoh një përparim në të ardhmen e afërt”, ka theksuar Romeo Franz për “Bota sot”.

Vuçiq ka ashpërsuar tonet ndaj kryeministrit të Kosovës, Albin Kurti, duke e quajtur “llum terrorist”, pas emërimit të Nenad Rashiqit, si ministër për Komunitetet në qeverinë e tij./Botasot

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat