Sot Lulzim Basha, 3 javë pas humbjes në zgjedhjet e 25 prillit dhe zbutjes të hidhërimit brenda strukturave të PD, ka njoftuar thirrjen e kryesisë dhe Këshillit Kombëtar të PD.
Pasi ka regjistruar një rezultat humbës dhe shënuar një katastrofë elektoralo-politike, duke pasur në kuti më pak vota se në vitin 2013, kur PD shkonte në garë pas 8-vitesh pushtet, Luli sot pritet të mbajë fjalimin e tij.
Kuptohet, mbledhja ka një qëllim mos njohjen e zgjedhjeve, por marrjen e mandateve dhe fillimin e rrogave për gati 59 ushtarë të Lulit dhe disa aleatë me dinjitet të dyshimtë politik e moral, ka edhe ndonjë përjashtim të vogël.
ka siguruar fjalimin që Basha do mbajë sot përpara kryesisë dhe Këshillit Kombëtar, ku pritet të përballet me kërkesën e fortë nga kritikët e tij, se duhet të dorëhiqet dhe të marrë përgjegjësitë për humbjen.
Nga ana tjetër mësohet, se Lulzim Basha do mbajë një fjalim të fortë me dy pjesë, mirënjohje ndaj shqiptarëve që përqafuan ndryshimin e ofruar nga opozita dhe mosnjohjen e zgjedhjeve.
Media ka zbuluar pjesë nga fjalimi që Basha do mbajë sot përpara strukturave më të larta të PD. Pas këtij publikimi, fjala do pësojë ndryshime, por në thelb do të ngelet sërish kjo. E dimë që po u prishim pak punë shkruajtësve, ju kërkojmë ndjesë, por s’mund ti rezistonim dot dhe po sjellim vetëm disa pjesë.
Pjesë nga fjala e Lulzim Bashës sot përpara kryesisë dhe këshillit kombëtar:
Blerja e votës u bë masivisht, u përdorën paratë e krimit, bandat dhe pushteti deformuan rezultatin, duke zhvlerësuar fitoren e demokratëve dhe opozitës. Duke vjedhur ndryshimin e përqafuar nga shumica masive e shqiptarëve.
Kjo ishte një garë e pabarabartë, por unë nuk kam ndërmend të njoh këto zgjedhje, ashtu siç ju më keni thënë në mijëra mesazhet dhe fjalët që kemi shkëmbyer këto ditë, pas këtij akti kriminal që ka shembur përfundimisht themelet e demokracisë, mbi të cilat është ndërtuar pushteti kriminal dhe i korruptuar i Edi Ramës, i cili orkestroi një skenar të qartë vjedhjeje votash.
Ne luftuam dhe do vazhdojmë të luftojmë, bëmë çdo betejë për të siguruar votën e lirë, por ajo që ndodhi me zgjedhjet e 25 prillit është triumfi i paligjshmërisë, vjedhjes, krimit elektoral Rama–Doshi-Rakipi.
Unë dhe PD nuk jepemi, kjo është një luftë për jetë a vdekje. Kjo është një luftë që kemi ndërmend ta vazhdojmë deri në fitore. Unë nuk tërhiqem nga askush dhe asnjëherë, përveçse nga e vërteta.
Ka me qindra e mijëra fakte e prova të pakundërshtueshme, të cilat po refuzohen nga institucionet zgjedhorë të kontrolluara nga Edi Rama dhe njerëzit e tij.
Raporti i OSBE-ODIHR, flet qartë për blerjen masive të votës që ngelet akti kryesor i deformimit të rezultatit.
Nxjerrja e të dhënave personale është akti më i rëndë dhe i pabesë që një qeveri mund të bëjë ndaj besimit të qytetarëve, është pengmarrje shtetërore.
Nuk ka gjë më të trishtë, se shitblerja e votës dhe nxjerrja dhe përdorimi i të dhënave personale për qëllime keq-dashëse politike elektorale.
Për shumë arsye mandatet për mazhorancën nuk kanë dalë nga qytetarët, por nga korridoret e errëta. Nuk ka gjë më të trishtë se blerja e votës.
Me qindra prindër, nëna, motra të rinj dhe të reja, me ata që ju përgjigjën ftesën time për një përmbysje të sistemit, ndryshimi fitoi, me fushatën që bëmë mori jetë ëndrra për ndryshim.
Të gjithë ata që u bënë pjesë që bashkë nisëm këtë rrugëtim kishin shpresë dhe gjetën shpresë tek unë dhe PD.
Në zgjedhjet e 25 prillit, diçka tjetër ndodhi. Me gjithë përpjekjet që unë dhe PD dhe opozita bëmë, me ligjin e dekriminalizimit me betejën pa kompromis me drogën, me imponimin që i bëmë Edi Ramës, ai shkatërroi marrëveshjen e 5 qrshorit, duke bërë ndryshim të njëanshëm të Kodit, që solli deformimin e këtyre zgjedhjeve, sërish krimi dhe paraja e pisët, presioni i shtetit nuk u ndal.
Blerja e votës u bë masivisht duke zëvendësuar debatin për alternativën me shukun e parave për votën. Duke zhvlerësuar planin dhe projektin me pagesë për varfërinë e thelluar, për ta bërë këmbimin e saj me të holla me para droge e krimi.
Qindra mijëra shqiptarë që refuzuan të shiteshin në këto votime janë një frymëzim për mua, ne kemi një rritje historike, për demokratët, por na bën të ecim përpara me dinjitet duke besuar në vlera europiane, që ne aspirojmë të shkojmë.
Do të ketë garë për kryetar sipas parimit “një anëtar, një votë”. Unë kam projekt dhe projektin tim e vlerësojnë demokratët. Unë mbaj përgjegjësi, jo duke ikur, por duke luftuar deri në fund me ta e për ta.
