Nga mjekët, mësuesit dhe policët, kategoritë që do përfitojnë rritje page, çfarë ndodh me pensionet

Shqipëria

Nga mjekët, mësuesit dhe policët, kategoritë që do përfitojnë rritje page, çfarë ndodh me pensionet

Më: 22 tetor 2021 Në ora: 18:28
Foto ilustrim

Këshilli i Ministrave miratoi sot projekt-buxhetin për vitin 2022, i cili parashikon rritje pagash për disa kategori duke filluar nga mjekët dhe infermierët, mësuesit si dhe punonjësit e policisë.

Kështu për bluzat e bardha dhe mësuesit, dy kategoritë që është premtuar rritje 40% deri në fund të mandatit të tretë të socialistëve, në vitin e parë është parashikuar një rritje me 6%.

Ministrja e Shëndetësisë Ogerta Manastirliu ka njoftuar vendimet e qeverisë për ndihmën e familjeve në nevojë, që përfitojnë asistencë. Paketa përfshin edhe fëmijët jetimë dhe gratë e trafikuara.

“Do të ketë një rritje për pagat për personelin mjekësor, mjekë dhe infermierë. Vetëm për 2021 është rritur 40% e pagave për mjekët, ne do të vijojmë në 2022 me 6% rritje të pagës për mjekët dhe infermierët duke u futur në fuqi nga 1 korriku 2022” tha Manastirliu.

Ndërkohë ministrja e Arsimit Evis Kushi u shpreh se nga rritja prej 6% në radhët e arsimtarëve do të përfitojnë edhe punonjësit psiko-social nëpër shkolla.

Rritje pagash do të përfitojnë edhe punonjësit e policisë së shtetit që ushtrojnë detyrën jashtë vendbanimit. “Rritje që do të vijë në formën e bonusit dhe që do të çojë deri në 150% pagat për punonjësit që ushtrojnë detyrën jashtë vendbanimit”, tha Bledi Çuçi.

Ndërsa ministri i Drejtësisë, Ulsi Manja njoftoi rritjen e pagave edhe për policinë e burgjeve dhe barazimin e gradave me punonjësit e policisë së shtetit.

Në buxhetin e vitit 2022 nuk parashikohet rritje e pensioneve, por vetëm paketa e bonusit të Vitit të Ri dhe indeksimi që shkon në linjë me normën e inflacionit, që ndodh çdo vit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat