Gjykata Kushtetuese e Republikës së Shqipërisë vendosi të shfuqizojë vendimin e Kuvendit “Për shkarkimin e Presidentit të Republikës së Shqipërisë për shkelje të rënda të Kushtetutës”.
Vendimi u mor mbrëmjen e djeshme (16 shkurt 2022).
Ish-kreu i Komisionit Qendror të Zgjedhjeve, Kristaq Kume, në një intervistë për Ora Neës, tha se procesi për shkarkimin e Presidentit kishte ngarkesë shumë të madhe politike por shumë pak elementë juridik.
Ai tha se vendimi i Kushtetueses është një moment i rëndësishëm për mirëfunksionimin e shtetit ligjor.
Kristaq Kume: Ky proces kishte një ngarkesë shumë të madhe politike por shuam pak lëndë juridike. Kam theksuar se Gjykata Kushtetuese ndodhet para detyrës se çfarë duhet dhe kur duhet që një veprim i Presidentit të përbëjë shkelje të rëndë të Kushtetutës. E vlerësoj këtë vendim të Gjykatës Kushtetuese si një moment të rëndësishëm për mirëfunksionimin e shtetit ligjor. Nuk e konsideroj si një vendimmarrje e cila zgjidh një problem tjetër midis institucioneve. Ajo Gjykatë ka për detyrë t’i përcaktojë gjërat mirë, procedurat o zbatohet ose nuk zbatohet në kuptimin e ligjit.
Ndër të tjera ai tha se ky vendim është një prurje në ecurinë e shtetit ligjor por edhe një tërheqje e mirë ndaj mazhorancës.
Kristaq Kume: Ky vendim i Gjykatës për mua është në të njëjtën kohë jo vetëm një prurje në ecurinë e shtetit ligjor por edhe një tërheqje e mirë ndaj mazhorancës për të mos keqpërdoru pushtetin dhe fuqinë që kanë në funksion të interesave politik të tyre. Fuqinë ta përdornin në të mirë të vendit.
