Ndryshon pista e hetimit/ Atentati ndaj Paplekajt në Durrës, hetuesit dyshojnë se ka qenë i sajuar

Shqipëria

Ndryshon pista e hetimit/ Atentati ndaj Paplekajt në Durrës, hetuesit dyshojnë se ka qenë i sajuar

Më: 18 prill 2022 Në ora: 10:54
Foto ilustrim

Durrës- Një atentat i mbetur në tentativë ndodhi të shtunën në Shijak të Durrësit. Në shënjestër ishte Orlando Paplekaj,por që shpëtoi pa u prekur nga plumbat.

Por si Orlando Paplekaj, ashtu edhe babai i tij, kanë hedhur poshtë mundësinë që të kenë konflikte të hapura me persona të tjerë.

Hetimet e deritanishme të Policisë së Durrësit nuk kanë dhënë rezultat, duke bërë që grupi i hetimit të mendojë edhe pistën e një ngjarjeje të sajuar për arsye ende të paqarta nga 31-vjeçari.

Grupi i hetimit, që shkoi në vendin e ngjarjes për të kryer veprimet e para dhe për të grumbulluar prova materiale, tha se kamionçina nuk është prekur nga asnjë plumb, ndërkohë që në vendin e ngjarjes u gjetën tri gëzhoja arme automatik tip kallashnikov.

Policia ka rimarrë në pyetje Orlando Paplekajn, i cili ishte shënjestra e autorëve. Paplekaj ka dëshmuar në Polici se ka qenë duke shpërndarë bombola gazi dhe oksigjeni me kamionçinë, kur një mjet tip “Golf”, pasi e ka ndjekur atë për 10 metra, pasagjeri që ndodhej në automjet, ka nxjerrë armën nga një thes dhe ka qëlluar në drejtim të tij.

Ai thotë se nuk i njeh autorët dhe nuk ka dijeni pse i kanë bërë atentatin.

“Kam qenë duke shpërndarë bombola gazi me kamionçinë, kur një mjet tip ‘Golf’ më ka ndjekur rreth 10 metra dhe pastaj kanë qëlluar. Pasagjeri i mjetit tip ‘Golf’ e ka nxjerrë armën nga një thes dhe ka qëlluar. Nuk i njoh atentatorët, nuk e di pse kanë qëlluar”, mësohet të ketë thënë Paplekaj.

Orlando Paplekaj është me orgjinë nga Tropoja dhe jeton në Durrës prej 13 vitesh, së bashku me familjen, ndërsa babai i tij punon në Burgun e Durrësit. Ai kishte pak kohë që kishte nisur punën e re, atë të shpërndarjes së bombolave të oksigjenit për llogari të një kompanie, ndërsa më herët ka punuar për disa kohë edhe si roje në disa kompani.

commentFirst article
Sot mund të lexoni Shfletoni kopertinat