“Plumbi i Artë”/ Dëshmia e Alibeajt në GJKKO: I dhashë Nuredin Dumanit 100 mijë euro

Shqipëria

“Plumbi i Artë”/ Dëshmia e Alibeajt në GJKKO: I dhashë Nuredin Dumanit 100 mijë euro

Më: 16 tetor 2025 Në ora: 13:43
Nuredin Dumani dhe Erjon Alibej

Në seancën gjyqësore të mbajtur këtë të enjte në GJKKO, në kuadër të procesit “Plumbi i Artë”, bashkëpunëtori i drejtësisë Erjon Alibej ka dhënë një dëshmi tronditëse përpara avokatëve, duke pranuar përfshirjen në disa nga ngjarjet më të rënda kriminale të viteve të fundit.

“Për vrasjen e Dorian Shkozës, unë i dhashë Nuredin Dumanit 50 mijë euro. Mbas ekzekutimit të vëllezërve Haxhia i dhashë pjesën tjetër. I ofrova 100 mijë euro në total për vrasjen e Dorian Shkozës. I kam shpjeguar Nuredinit që mos e kalo urën, hap krahun djathtas dhe është një makinë ML e zezë,” – deklaroi Alibej gjatë dëshmisë së tij.

Ai shtoi më tej se për vrasjen e Regis Runajt ishte përfshirë Xhuljano Hoxha, ndërsa vetë nuk ishte marrë me armët në këtë rast.

“Për ngjarjet e tjera, armët thuajse i kam siguruar të gjitha te Hoxha, për të cilin kam dhënë deklarime më parë,” – shtoi ai.

Në lidhje me vrasjen e Bujar Çelës, Alibej tha se Nuredini kishte armë vetë dhe nuk i kujtohet nëse i kishte kërkuar armë.

“Ka pasur raste kur kam pas edhe armë gjendje. Për vrasjen e vëllezërve Haxhia, një makinë e ofrova unë. Me atë u bë ekzekutimi. Ma dha një djalë nga Shijaku, shok i hershëm i vëllait tim të ndjerë dhe ai ma ofroi. I thërrasin Alban Qerosi, emër mbiemër nuk ia di. E kam takuar disa herë këtë person, shumë herë.”

comment Për komente lëvizni më poshtë
Sot mund të lexoni Shfletoni kopertinat