Eva Dumani u rikthye në Shqipëri mesditën e sotme dhe u bashkua me nënën e saj, Mide Dumani, pas 12 vitesh qëndrimi në Siri. Ajo ishte dërguar atje nga i ati dhe prej asaj kohe familja kishte kërkuar vazhdimisht rikthimin e saj.
Fillimisht, Eva mbërriti në kufirin mes Sirisë dhe Turqisë, ku autoritetet turke zhvilluan procedurat e nevojshme të verifikimit. Sipas dajës së saj, Xhetan Ndregjoni, ajo qëndroi për disa orë në intervistë nga strukturat e sigurisë. Me ndërhyrjen e autoriteteve shqiptare, ajo arriti të kthehej në atdhe paraditen e së premtes.
Ndregjoni deklaroi se gjatë 12 viteve familja u përball me tentativa të shumta për ta sjellë Evën në Shqipëri, përfshirë raste kur mori premtime që nuk u realizuan. Ai përshkroi takimin e parë me mbesën në Turqi, duke theksuar se e kishte parë për herë të fundit kur ishte 8 vjeçe, ndërsa sot ajo është 20 vjeçe. Gjatë viteve të ndarjes, komunikimi kishte qenë i kufizuar në mesazhe zanore.
Nëna e saj bëri të ditur se Eva ndodhet në gjendje të mirë dhe po kalon ditët e para pranë familjes. Fillimisht, ajo do të qëndrojë me të afërmit për t’u përshtatur, ndërsa më pas institucionet do të ndjekin hapat për integrimin e saj në jetën e përditshme në Shqipëri.
Rikthimi i Evës përmbyll një proces të gjatë për familjen Dumani dhe hap një fazë të re për jetën e saj në vend.
Xhetan Ndregjoni: Kemi kaluar 48 orë të vështira pasi Eva mbërriti në kufirin turk me Sirinë. Autoritetet turke të sigurisë e kanë intervistuar Evën për disa orë, por më në fund, me ndihmën e autoriteteve shqiptare, ajo mbërriti paraditen e sotme në shtëpi.
Mu hodh në qafë e vetëm thoshte: daja, daja… nisi të qante. Ishte e frikësuar, pasi ishte rrethuar me njerëz të panjohur, të cilët e sollën nga një rrugë e gjatë prej Sirisë në kufirin me Turqinë.
Nuk munda ta besoja se ajo mbërriti. Hera e fundit kur e kisha parë ishte 8 vjeçe. Ajo sot është 20 vjeçe. I dridhej zëri kur më përqafoi. Deri në atë moment ia kisha dëgjuar zërin vetëm nga mesazhet zanore që na dërgonte. E gjitha ishte e pabesueshme, pasi në të shkuarën shumë herë na ishte premtuar se do ta sillnin Evën, por nuk ndodhi.
I jam mirënjohës shumë njerëzve të përfshirë në sjelljen e Evës në shtëpi.
Mirënjohje të pafundme për çdo njeri që besoi tek Eva dhe për çdo njeri që ndihmoi që Eva të jetë sot pranë familjes! Faleminderit! Faleminderit!”.
