Fyerjet në Kuvend/ “Etika” fal Ballën, përjashton me nga 10 ditë Bardhin e Balliun, bashkë me Shehajn do të mungojnë…

Shqipëria

Fyerjet në Kuvend/ “Etika” fal Ballën, përjashton me nga 10 ditë Bardhin e Balliun, bashkë me Shehajn do të mungojnë…

Më: 10 mars 2026 Në ora: 08:29
Kuvendi i Shqipërisë

Hetimi i Prokurorisë së Posaçme (SPAK) ndaj ish-zv/kryeministres Belinda Ballukut, nisi edhe prej kallëzimit të tij. Por kreu i grupit parlamentar të Partisë Sociliste, Gazment Bardhi, nuk do të jetë në seancën plenare të 12 marsit, kur do të hidhen në votë 2 raportet mbi kërkesën e SPAK për arrestimin e ish-numrit 2 të qeverisë.

Sekretariati i Etikës e përjashtoi me 10 ditë nga seancat dhe komisionet parlamentare. Në seancën ku do hidhet në votim raporti i PD pro arrestimit dhe ai i PS-së që refuzon SPAK-un, do të mungojë edhe Klevis Balliu për të cilin socialistët kishin kërkuar 20 ditë përjashtim por sekretariati vendosi për 10 ditë.

Vendimet lidhen me përplasjet mes deputetëve në seancën plenare të 5 marsit, pasi kreu i grupit të PS-së, Taulant Balla, iu adresua me numrin 0900 deputetes demokrate Albana Vokshi. Një situatë kjo që nxiti reagimin e shefit të grupit të PD-së, Gazment Bardhi, i cili nga ana e tij kaloi deri në prekje të moralit të grave socialiste. Por ai që e nisi sherrin shpëtoi. Socialistët falën shefin e grupit të tyre Taulant Ballën për të cilin demokratët kërkuan plotë 60 ditë përjashtim. “Nuk mund të barazohet një prefiks telefoni me gjuhën dhe sjelljen e opozitarëve”, tha Balla.

Nga mbledhja e grupit të PS-së, ishte Evis Kushi, e cila propozoi miratimin e një rezolute të Partive Popullore Evropiane aleate të PD-së për të ndaluar gjuhën denigruese në kuvend. Seancës së 12 marsit do t’i mungojë një tjetër zë kritik ndaj ish-ministres së Infrastrukturës, Agron Shehaj, i cili ka kërkuar disa herë interpelanca me të. Këtë të hënë Byroja e Kuvendit, la në fuqi vendimin e Sekretariatit të Etikës për përjashtimin me 20 ditë. Sekretariati për Procedurat, Votimet dhe Etikën, përbehet nga 3 socialistë më në krye Ulsi Manja dhe dy deputetë të opozitës ndërsa vendimet merret me shumicën e votave. Prej së enjtes së kaluar sherri që degradoi në ofendime dhe gjuhë të papërshtatshme ka dominuar debatit publik në vend.

comment Për komente lëvizni më poshtë
Sot mund të lexoni Shfletoni kopertinat