Dhuratë Sylejmani e Valmira Ramadani fitojnë trofeun në Kampionatin e Kosovës në Beach Volley për seniorë te femrat - Fatlum Hajrizi e Erion Ramadani triumfojnë te meshkujt.
Kampionati i Kosovës në volejboll në rërë për vitin 2022 është mbyllur me ndeshjet finale të së dielës, derisa për dy ditë janë zhvilluar plot 30 duele interesante - 16 te meshkujt dhe 14 te femrat, të cilat zunë vend në "Holiday Resort".
Në konkurrencën e femrave, dyshja Valmira Ramadani dhe Dhuratë Sylejmani triumfuan pasi mposhtën në finale dyshen me eksperiencë Xhudjena Kruti dhe Adelajda Prenga me rezultat 2-0 (21-18, 21-14) në sete.
Në përballjen për vendin e tretë, dyshja Rinesa Hasani/Loresa Avdyli mposhti çiftin Yllka Jashari/Melirona Avdullahu.
Në anën tjetër, në konkurrencën e meshkujve, dyshja Fatlum Hajrizi/Erion Bajrami siguroi titullin pasi në finale mposhti çiftin Art Terstena/Ermal Maliqi me rezultat 0-2 (13-21, 19-21) në sete.
Vendin e tretë e siguroi dyshja Adriatik Berisha/Armend Berisha pasi mposhtën rivalët Alfred Pllana/Valmir Demin me rezultat 0-2 (19-21, 19-21).
